Pathianni tlai atang khan Tennis a inelna Grand Slam pali zingah Clay a khelh awm chhun French Open khelh tan a ni. French Open 2024 khelh tan niah mipa lamah champion tura rinkai zinga mi Andrey Rublev a chak nghal a. Hmeichhe lama ngaihven hlawh zinga mi Naomi Osaka chuan tlawm pumpelhin second round a lut ve bawk. ‘Clay Court lalpa’ an tih hial Rafael Nadal hun hnuhnung tura ngaih a nih vangin French Open 2024 hian ngaihven a hlawh hle.
Inelnaa tan niah he hmuna quarter-final la paltlang ngai lo Sixth seed Andrey Rublev chuan Japan tlangval Taro Daniel a hmachhawn a, set khat hloh chungin Russian Rublev hian hnehna a chang.
Mipa lamah player langsar zinga mi Rublev hian Daniel lakah bul a tan tha a, set khatnaah game hnih chiah a hloh. Awlsam takin set khatna la bawk mah se, set hnihnaah an inhnehtawk ta viau thung a, tie-break ah Daniel a chungnung ta hial a ni. Set khat ve ve an lak hnuin Rublev hian set hnih a la zawn leh a, 6-2 6-7 (3-7) 6-3 7-5 a hnehna changin, second round a lut. Rublev hian Pedro Martinez leh Thiago Agustin Tirante te inkhel a chak zawk zawk a hmachhawn zui leh ang.
Pathianni a inkhel dangah 17th seed Ugo Humbert chu Lorenzo Sonego lakah 6-4 2-6 6-4 6-3 in a tlawm ve thung.
Hmeichhe lamah World No. 1 hlui Naomi Osaka chuan Lucia Bronzetti a hmachhawn a, harsa taka hnehna chang hramin second round a lut.
Osaka hian Bronzetti lakah bul a tan tha viau a, game khat chauh hloh chungin set a la. Set khatnaah che chhe viau mah se Italian Bronzetti a insiamtha a, game li hloh chungin set a la let.
Set khat ve ve an lak hnuin deciding set-ah an inhnehtawk zui viau a, game an inlakchhawk zak zak. Chak tura rinkai zawk Osaka hian deciding set-ah 4-0 ngawtin hma a hruai hman. Awlsam taka chak tura ngaih a nih laiin a khingpui hian na takin a nawr let a, 4-4 a ni ta hial. Chak tur zawk rin thiam har khawpa an inhnehtawk hnuin Osaka hian break pawimawh tak a nei leh hlauh a, 6-1 4-6 7-5 a chakin second round a lut ta a ni.
French Open champion lai Novak Djokovic chuan French wildcard Pierre Hugues-Herbert hmachhawnin bul a tan dawn. Grand Slam-ah vawi 24 zet champion tawh Djokovic hian kum chhe tak a hmang mek a, 2024 chhungin final a la lut miah lo. Geneva Open-ah semi-final paltlang zo lova a tlak hnuin French Open a hmachhawn zui leh nghal dawn a, champion nawn leh tumin tan a khawh ang. Rolland Garros-ah a champion zo lo a nih chuak a trophy kawl mek bakah No. 1 a nihna a hloh zui ngei tura ngaih a ni.
French Open a ngaihven hlawh em em reng, he hmuna vawi 14 zet champion tawh Rafael Nadal chu inelna hmachhawn turin a inbuatsaih zel a. Nadal hian player langsar Alexander Zverev hmachhawnin bul a tan dawn. Zverev a hneh lo a nih chuan Nadal hian Tennis a chawlhsan zui rin a ni a. A la chawl chiah lo a nih pawhin French Open ah inelna hmachhawn turin a kir leh a rinawm tawh lo thung.