THURÂWN – 35 + Online-a bungraw chahtu khawngaih thlâk!

• Lallunghnema, Charity Lodge

THURÂWN HMASA :

1. Thil lei mai mai suh.
2. I awh zâwng leh i châk zâwng lei ringawt suh.
3. Nang leh in chhungkaw mamawh chauh lei rawh.
4. I lei tur (item) list keng rawh.
   5.Thil man hisâpin pawisa pai thin rawh.
5. Thil zuartute nêp chîng suh.
6. I thil lei tur chu bêl chiang hmasa thin rawh.
7. I duh zawng i thlang thei tih hria ang che.
8. Riltâm chungin bazarah kal suh.
9. I mamawh chauh lei rawh.
10. I thil leinaah cash memo la zel rawh.
11. I thil hman leh tihnaah Receipt emaw Voucher emaw la zel ang che.
12. Bungraw chhia leh him lo lei suh.
13. Dawrkai leh sumdawngte hlau suh.
14. I dawr loh chuan tunge dawr ang?.

THU RÂWN HNUHNUNG:

1. I thil lei dawnin fimkhur hle rawh.
2. Thil i lei dawnin hman hmawh suh.
3. Hawih hâwm takin mi dang be thin rawh.
4. Pawisa chhia hmang suh.
5. I hriat duh chu zâwt hreh suh.
6. I thil lei chu sawisêlna (complaint)i neih chuan rei kawl suh.
7. Cash memo leh i thil lei chu vawng tha rawh.
8. Chapo takin dawrkai leh sumdawngte be thin suh.
9. Thil leisaktu i ni a.I pawimawh ber.
10. I mamawh zuartute chu thil zuartute an ni.
11. Inmamawh tawn kan ni tih theih nghilh suh.
12. Chapona leh duhamna bansan rawh.
13. Dawhthei takin bazaar ang che.
14. Hawihhawmna hi hnehna a ni.
15. Rinawmna hi consumer te lallukhum a ni.
16. Sumdawngte tan malsawmna a ni.
17. Thil lei turin i piang lova.
18. Thil lei erawh i nun chelhtu a ni.
19. Nun I duh chuan thil lei rawh.
20. Consumer mawl tak ni suh ang che.

Man tlâwm apiang ûm suh.A to avangin a tlo lova,a rate a san avangin a tha hran hek lo.

IN ZAWHNA KHIRH KHAN:

May 13 leh May 20-a ka thu leh hlate kha consumer commission judgement-te an ni a. May 13 a kan thupui kha ‘Sumo neitu cheng sanghnih chawitir thu a ni a. May 20-a kan rawn chhawp chhuah kha, ‘Bungraw chah, a tak awm lo, a kâwr ringawt chah thlensaktu hrem thu’, a ni thung a. Chhiar in tam a, lo tuipui in awm nual tih ka hre bawk. Lo chik zual ten pawisa chu an chawi tak tak em? an inpe ngei em? ti pawl in lo awm tih ka lo hria a. Hetiang sî sê te hi chu kan ûm zui hman bik lêm lo a ni!

BUNGRAW CHAHTU KHAWNGAIH THLAK:

He Column-a ka sawi tawh ang khan April ni 25 khan Tuipângah Consumer Awareness Programme kan va hmang a.Conumer-ten harastna an lo tawk nasa ve hle a. He khaw lian tak Tuipanga Khawtlang hruaitute leh thuneitute hi an tanrual a ngai hle niin ka hria a.He khawpui atanga ka Message dawn pakhat hi Awareness atan ka han zep lawk dawn a ni.

“Dt 22.4.24 leh 23.4.24 khan Amazon-ah chhang siamna thleng (mould ) 50 kan chah a,a lo thleng ngei a.Mahse,an teh dan leh kan teh dan a lo inang lo nge ni dawn,keiniin 8 inches kan chah a,an niin 7 inches min lo thawn ta si a,a tet avangin thleng lêt kan han tum a.Amazon Office Siaha a thawk Delivery Boyten mahnia inbuaipui a,Daka thawn let turin min ti a.Daka thawn ringawt tur chuan bo palh thei emaw kal sual palh thei emaw a ni si a.Chung chu thleng ta se, kan chawi thlawn mai dawn si a.Hmalakngaihna ka hre si lova,khawngaiha min tanpui turin i khawngaihna ka ngen a che”.

• I khawngaihna diltu,
  Tuipang atangin.
• 7085359582.

Hei hi ka sawi duh.

Online-a thil chah hi kan intih hmuh hle a.A chahtute kan fimkhur lo hle bawk.Harsatna mi tam takin an tawk a,mi tam takin bungrua an chân a,mi tam takin pawisa an chawi bawk thin.Hetiang business hi a zau hle. Khawvel Market lian zawk a luah a ni,an ti thin.A tlawm a,a hahdam thlâk bawk.Mahse,sumdawng rinawm lo avangin mi tam tak an buai mek a nih hi! – llh.