Mizoram University a Department of Zoology a Prof. H.T. Lalremsanga leh a research scholar te chuan Mizoram hmun hrang hrang a rul an zirchiannaah India ram a rultuha record la awm ngailo, Trimeresurus uetzi chu Mizoramah an lo awm ve reng a ni tih hmuchhuakin, he an zirchianna hi Indian Biodiversity scientific journal lian ber, Journal of Threatened Taxa volume 16 issue no.5 chuan May 26, 2024 khan a tichhuak.
Trimeresurus uetzi hi rultuha chikhat, vang tak mai a ni a. Nikum 2023 khan German, Vietnamese leh French scientist tangrualte’n Myanmar ram chhung, Mandalay, Sagaing, Magway, Bago, Chin & Shan states atangin species thar a ni tih an hmuchhuak a. An lan danah chuan Rultuha pangngai (Trimeresurus erythrurus) nena inang leh hriat hran har tak, cryptic species an ni a, an DNA leh phuhlip zirchian erawh chuan danglamna an lo nei teuh a. Myanmar chauh a awm (endemic species to Myanmar) emaw tihlai a, Mizoram ah an lo awm ve reng a ni tih hmuhchhuah a lo ni ta a ni.
Tun dinhmunah chuan India ramchhung a Rultuha (Trimeresurus) species chi hrang hrang record awmsa 20 ni thin kha 21 a ni dawn ta a, Mizoram bikah chuan kum 2022 a Champhai atanga hmuhchhuah tawh Trimeresurus mayaae tiamin Rultuha species 4 record a nei ta a, hei hian Zoram leh a chhehvel hi continental drift avanga Indian subcontinental leh Southeast Asia insuihfinna lai a nih avangin nungcha tinreng (biodiversity) ah a hausakzia a tichiang hle nia sawi a ni.