- Ruata
Tunhnai maiah khan Nissan company chuan an compact SUV lar leh hralh kal tak Magnite chu Geza special edition an tlangzarh a, tunah hemi model-ah tho hian CVT hmang an tlangzarh thar leh.
- Nissan Magnite Geza special edition
Nissan India chuan Magnite Geza special edition hi tun thla tir lamah khan Rs. Nuai 7.39 (ex-showroom) man atanga intan turin an tichhuak a. Variant khatin an tichhuak a, a khawl lamah pawh 1.0 litre naturally aspirated petrol khawl, 72bhp power pechhuak thei a hmang a. Transmission lamah chuan 5 speed manual a hmang bawk a ni.
- Nissan Magnite Geza CVT special edition
Tunah hian Nissan India chuan he model leh special edition tharah vek hian automatic transmission hmang an tlangzarh veleh ta a. India ram, automatic transmission hmang lei duh an pun zelna hmunah hian he special edition lirthei automatic gear nei hian lei a hlawh viau a beiseiawm a ni.
Nissan Magnite Geza CVT special edition hi Rs. Nuai 9.84 (ex-showroom) man a ni thung dawn a. CVT hmang a nih vang hian manual hmang nen a landan leh kawng hrang hrangah danglamna vak a awm chuang lo a. Rawng pawh a inang chiah intawmin rawng chi 5 – Storm White, Sandstone Brown, Flare Garnet Red, Onyx Black, leh Blade Silver te duhthlan tur a awm a ni.
Nissan Magnite Geza CVT special edition hian beige rawng seat dak nalh tak mai a nei a, ambient lighting phone app hmanga thunun theih a neih bakah a ken tel hrang hrang zingah hian 9-inch touchscreen infotainment system, wireless Android Auto and Apple CarPlay connectivity, rearview camera with trajectory line, JBL speaker, Geza badge, leh shark fin antenna te a tel a ni.
- Nissan Magnite tuai thar kum 2025-ah?
Nissan Magnite sawi takah chuan he model hi company lam chuan tuai hnum thar an tum mek a. A mid-life update hmasa ber ti a an sawi, hmel thar leh design thar nena tihchhuah an tum hun hi nakum, kum 2025 kumtir lam beisei a ni a. A thlalak darh tawh leh hriat theih chin atanga a landani tuna chhuak mek nena khaikhinin a danglamna a tam vak dawn lo tih media report hrang hrangin an tarlang tawh a ni.
A khawl pawh a ngai ang chiah a la nih hmel a. A hma grille, headlamp cluster, leh LED signature thenkhatah danglamna kan hmuh hmel a. A hnung leh hma bumper design pawh a rawn danglam hret beisei a ni a, alloy wheel design thar hlak bakah rawng thar duhthlan tur hrang hrang beisei a ni bawk a ni.
- Nissan hmalakna dang
Nissan hian India ramah hian ruahmanna thar hrang hrang an nei mek a. New-generation Renault Duster nghahchhana duan tur SUV thar bakah A-segment EV lirthei thar tichhuak turin hma an la mek a ni.
Nissan SUVs thar tur hian Duster thar platform leh khawl te a rawn tawm beisei a ni a, hetihrual hian a hmelhmang leh a kentel hrang hrangah erawh a hrang hlak a nih hmel thung a. Nissan Electric Vehicle (EV) thar tur pawh hi CMF-B EV platform nghahchhana duan tur niin design leh develop hna chu Renault Nissan Technology Business Centre India R&D center-ah an thawk dawn bawk a ni.