Rel kawng siamna hmanrua bo chungchanga Police Station-ah FIR 17 theh luh a ni tawh.
Thawhtanni chawhnu khan DC Conference Hall, Kolasib-ah John LT Sanga, Deputy Commissioner hovin Kolasib district chhung a North East Frontier Railways hmalakna enletna leh harsatna an tawhte an sawi ho a. He huna tar lan a nih danin, rel kawng siamna hmanrua tum eng emaw zah a bo tawh avangin Bairabi PS ah FIR 10 leh Kawnpui PS ah FIR 17 theh luh a ni tawh.
Thutkhawmah hian bungraw bo te hmuh let a nih theih nan theihtawp chhuah a nih thu te, bungraw lian tham tak tak bo a awm thin avangin pawi khawihtute hi pawn lam mi an nih theih thu te, bungraw dah thatna rintlak tak ruahman dan turte leh a vil turin khawtual mi rintlak dah ngei a nih theih dan turte rel a ni.
Bairabi khaw bul Tunnel no. 1 atangin electric wire thahnem tak leh bulb eng emaw zah a bo thu NEFR a thawktute hian an sawi bawk.
Rel hmanga inkalpawhna tha zawk, tangkai taka hman thuai a nih theih nan bungraw bo zawn chhuah leh pawi khawihtute hrem an nih ngei theih nan Kolasib District-a thuneitute chuan theihtawp an chhuahpui zel tur thu sawiin, an harsatnate a hmun ngeiah DC leh SP, Kolasib te hian an enpui tur thu an sawi a. July 2024 chhunga Hortoki thleng rel luh tir tur a NEFR te hmalakna chu lawmawm an tih thu leh, relin a paltlang tur khaw mipuite pawh lo inhmakhua lawk a pawimawh thu sawi a ni.
Thutkhawmnaah hian David H Thangliana, SP, Melody Ngurthantluangi, Addl. DC, Christina Lalmuanzuali SDO (Sadar), Gilbert Lalhlimpuia SDC, Dr. Lalramdintluanga SDO(C) Bairabi, Mohamud Aequib, SDO(C) Kawnpui, Hitesh Jaissal, Deputy CE, Kawnpui, Partha Pastim Dhar, D&M (P), Ranjiv Kumar, HR Officer, Sunil Sharma Project Manager leh hotu dang te an tel.