Nimin khan Aizawl khawpuia lui pawimawh leh hmingthang Chite Lui humhalh tur a hmalakna chungchangte chiang zawk a hre turin Chief Minister Lalduhoma chuan a pisa-ah Save Chite Lui Executive Committee aiawhte a kawm a, an hmalak tawhna hrang hrangte a ngaithla a, an hmachhawp bawhzui dan turte a sawipui bawk a.
Save Chite Lui Executive Committee hruaitute chuan Chite Lui tana beihna (Save Chite Lui Movement) chu kum 2007 a bul tan a nih thu leh kum 2017 atanga awmze nei lehzual a kalpui chhoh zel a nih thu an sawi a. Comprehensive Action Plan a ruahman sa angin hmalakna kalpui a nih thu leh Action Plan Phase I chu zawh chhoh mek a nih thu Chief Minister hnenah an hrilh a. Phase I chhunga hmalakna hlawm lian zingah Baseline Survey te, nasa taka public awareness siam leh dan hmang a lui humhalhte chu hlawhtling tak a hlen chhuah a ni tih tarlan a ni a.
Chite Lui hi Indian Army in Adopted River atana an thlan thute, Prime Minister Radio Programme Mann ki Baat (MKB) ah tarlan a nih thute, MKB ah tarlan a nih avangin sorkar laipui atangin duhsakna leh chhawmdawlna tam tak a awm theih dante sawiho a ni a. Save Chite Lui Movement avanga Mizo mipuite thinlungah kan ram a luite humhalh duhna kawng a harhtharna a lo piang zel leh note engemawzat a hring zelte hi chanchin lawmawm a nih thu tarlan a ni.
Action Plan Phase II angin Riverfront Development atan sorkar laipui atanga sum hmuh dan tur sawiho a ni a. Bawngkawn ram a Chite Lui hnar atanga Bethlehem Vengthlanga World Bank Road-a PWD Lei (bridge) thleng a Chite Lui kam tuak riral zel tur venna tura lungrem dan turte sawiho a ni bawk a.
Chief Minister leh Save Chite Lui Coordination Committee Chairman ni bawk hova thutkhawm zui chungchang pawh sawiho a ni bawk a ni.