- Rempuia R. Lutmang
Mi an fing zel a, thil engkimah hma kan sawn chho a, chutiang karah chuan thumal ziah dan pawhin hma a sawn ve lo thei lo. Thumal ziah danin hma a sawn dan hi kawng khat chauh chu a ni lo na a, ziah zawm ngai loh atangin a inzawmah a chhuak duh hle, a inzawm thin atanga inzawm ta lo te pawh a awm ve tho, chu chu khawvel grammar dan a ni te pawh kan ti thei ang.
“All right” tih aiah hian “alright” tia ziak ta mai an tam em em a; chuti chung chuan ziah zawm hi a dika ngai thei lo an la awm. “The Blue Book of Grammar and Punctuation (2004)” ziaktu Jane Strauss chuan “All right tih hi thumal pahnih a ni a. Eng tikah emaw chuan alright tih hi hman tlânglâwn zawk a la ni mai thei, tunah chuan a la ni rih lo,” a ti. ‘Alright’ chu dictionary tam takin thumal dikah an la pawm lo. Chutih lai mek chuan Merriam-Webster leh Oxford te chuan an dictionary-ah an seng lut tawh thung.
“The Chicago Guide to Grammar, Usage and Punctuation (2016)” tih lehkhabuah Bryan A. Garner chuan, “Tun hnuah grammar chungchanga rin dan inang loah han buai deuh lat lat châng a awm a. Kan thiam tam poh aleh kan hriat tlemzia a chiang tulh tulh ni berin a lang,” (Grammatical theories have been in upheaval in recent years. Seemingly the more we learn, the less we know) a lo ti a. L. Keivom tawngkam hriat chhuah a awl hle, ani khan, “I bozia leh i hriat lohzia i hriat chhuah kha chuan rah bi thui tak i zawh tawh tih hre rawh,” a lo ti ve daih tawh a. Hetiang tawngkam hi thil thar a ni lo thung, Socrates te, Aristotle te hun lai atang daih tawha tawngkam lar tak, “The more you know, the more you realize you don’t know,” tih lam hawi a ni ber e.
Bryan A. Garner vêk hian grammar term kilkhawr pui pui leh chipchiar leh lutuk chungchangah, “Grammar chu a chipchiar poh aleh a taka hmangtu tur an tlem ting a ni mai,” (the more detailed the grammar, the less likely it is to be of any practical use to most writers and speakers) a ti bawk. Grammar-ah hian a chipchiar leh lutuka sawi fiah tuma dân zam chawp a tul lohzia leh a pawimawh tak tak lohzia a sawina a ni mai ang chu. A tak taka an hman peih miau si loh chuan eng atan nge ni chuang ang le? Heng thu ho te te atang pawh hian mahni tawka dan chipchiar zam vak hi a thu dik ni nghal mai loin duhthusam a ni thei tih a hriat theih a, a lo tul teh chiam lo tih a hriat theih bawk. Mi dangina an awih ve nghal zel beisei phei chu thil atthlak tak a ni thei ang.
Garner-a tawngkam sawi ta zel ila, “Grammar chu [Mizo] tawng hmangtute’n a taka an hman dan sawi fiah tumna, thu dika innghat a ni tur a ni, nger lam nei saa ngaih dan sakhat tlut mai hmanga ‘a ni tur leh a ni lo tur’ duana a grammatical leh ‘cal lo lo thliar chawp ang chi chu sîrah hnâwl tur a ni,” (Grammar should be an attempt to describe the English language as it is actually used—beginning with the facts and not with ingrained biases about what should and should not be considered grammatical) a tih te hi a dik hle mai a, grammar lam tuipuitute sermon hluaina tham a tlingin ka ring.
Bas Aarts chuan, “Tawng zir chianna lam grammar hi a hmang mektu, a tawng neitute tawng hman thin danglam zelah a innghat a; mahni mi mal duh dana dân lo zamtute leh a zira zir thiam rualte thutlûknaa innghat a ni lo” a ti ve bawk a (“The grammar of a language is shaped over time by the speakers of that language, not by self-appointed individuals or learned bodies.”—Bas Aarts, Department of English Language and Literature University College London; Oxford Modern English Grammar, 2011). Bryan A. Garner nen an ngaih dan a inhlat lo hle.
An hming kan han sawi lan takte kha khawvel pum huapa mi thiam filawrte zinga mi an ni a, anni meuh pawh hian an ngaih dan leh an rin dan hmangin grammar dan an zam mai mai thei lo tih an hre chiang viau ni tur a ni, grammar dan dik leh dik lo lamah an tawng pung pung duh lo em mai. He laiah hian grammar dan lo zam vak tawk kan nei ve fo a, an tui zawng a ni a, an taima a, an fakawm hle; amaherawhchu, an rinthu zawng zawng kha mi dangin pawm vek se min ti deuh uaih uaih thin erawh hi chu a fel lo.
Music lam thiamte hian solfa lam thil kilkhawr pui pui min titipui reng tum ta mai se a ninawm duh hle ang. Mathematics thiam te pawhin a hming pawh kan hriat mang loh, an thiam thil min barh luih tum reng mai se beng an tikham mai mai ang. Anni phei hi chuan an rinthuin dan an la zam ve lo mah mah lehnghal (a Sap tawng lamah chuan ‘theory’ tih chu an hmang tho a).
Pathian thu lam zirnaah pawh, ngaihtuah nachang kan hriat loh thumal pakhat lek te hi lehkhabu pakhat daih dawn te an chip thei, chutiang ringawt chu min hlui reng ta mai se an bulah kan awm tha peih lo ang. Literature zir bingna lam pawh chutiang deuh tho chu a ni, a Sap tawng nen an sawi teuh thei zel. Thil reng rengah hian vantlangina an zawh tawk, a ngaihnawm chin hi a awm ve. Thlan tla zawih zawiha hna thawka mahni hrawk chawm tur kan nih avangin a nazawng kan tuipui ve hman lo. Chutiang ni lo a, a zawng a zaa mi dangte tui ve tura beisei tlat chu thil atthlak tak a ni thei.
Grammar lama tui mi thenkhat chuan ziak mite mai ni lo, mi zawng zawng hi grammar lama tui ve vak turah te an beisei mai thin. Grammar term penhleh leh pilril pui pui min barh luih phet an tum a, kan ngaihsak lohin ‘tawng hmakhua ngai lo’ ang lek lekah te min han chhuah ta uaih uaih mai thin a. An tuina lam a piangah a ril leh a pumpui kan zutpui an beisei a, chutiang tur a ni si lo. Chu vang chuan, grammar tih tuah hum reng mai hi a lo ni ber lo a ni e.