Aston Villa siam lian thar lehtu Unai Emery chuan Villa Park-ah cham chhunzawm zel turin rinawmna thu a tiam thar leh a, kum nga daih contract thar a ziak.
Manager tawnhriat ngah, Europa League a hming chher tak Unai Emery hian October 2022 khan Steven Gerrard thlakin Aston Villa hi a enkawl tan. Villa a enkawl tirh hian EPL-ah 17-na an ni mek a, a theihna lantir turin fiahna hautak tak a hmachhawn. A enkawl tirhna 17-na daiaha awm kha season a tawp meuh chuan pa 7-na a nihpui ta hial a, fak a hlawh hle. 1982 European Cup champion Villa hi kum 13 zet hnuah European Competition a khelhpui a, Europa Conference League semi-final a hruai thleng hial nghe nghe.
Season khat em pawh a enkawl tlin hmaa hma a sawnpui dawrh Villa hi 2023-24 season-ah hma a sawnpui leh zual a, EPL-ah palina niin champions league khel turin a hlangkai. Club ropui, hausa leh hlun tak tak Manchester United, Chelsea leh Tottenham te chungah an awm ta hial hi Emery vang liau liau a tih ngam. UCL meuh an khelh dawn tak hial vangin Villa thuneitut pawhin Emery hi an duh hleuh hleuh hle a, kum nga daih contract an ziahpui ta hial a ni.
EPL club lian Arsenal pawh lo enkawl tawhtu Emery chuan, “rahbi thar tuk leh thei tura hun remchang ka nei hi ka lawm hle. He hmun hi ka In ang hialin ka ngaina a, kan duhthusam te tihlawhtling turin theihtawp kan chhuah tlang zel ang.” tiin contract thar a ziah chungchang a sawi.