French Open 2024 khelh mekah player ngaihven hlawh tak Rafael Nadal chu thawhtanni khan Alexander Zverev hmachhawnin a inlan a. ‘Clay Court lalpa’ an tih hial Nadal hi Zverev hneh lovin a tlawm nghal a, mittui nen inelna lian a mangtha hnuin Rolland Garros-ah a inlan zui tawh lo mai thei.
Rolland Garros ah hneh thei lo ang maia inlan thin, a chak zo dawn ta lo emaw tih hnuah pawh ropui taka chak a, champion leh mai thin Nadal hi kum 2024 khan a ropuina hmunah hian a inlan thei lo tawh a. Hliamin a tihbuai reng vangin 2024-ah pawh hian a inlan thei dawn em tih a chiang lo reng. French Open a hmachhawn leh ang nge, Tennis a chawlhsan tawh dawn zawk tih a buk fe hnuin inelna hmachhawn a thlang ta a ni. Hun hmasa lamah 2024 hi French Open a hmachhawn hnuhnung ber tur a nih thu a lo sawi tawh a, hei vang hian he hmuna vawi 14 zet champion tawh Nadal hian ngaihven a hlawh lehzua. Court Philippe Chatrier ah lawm hlawh viau mah se khingpui hautak tak a neih nghal vangin a kawng a zawh tawp nghal ta thung.
Nadal hian Zverev lakah record nei tha zawk mah se hliam vanga a chawlh rei vangin a khelh thiamna hmunah ngei pawh rinkai lo zawk a ni. German 4th seed Zverec hian rinlawk ang ngeiin a khel tha a, set khatnaah break pawimawh tak a nei a, game thum hloh chungin set a la.
Set la hmasa zawk a nih vangin Zverev hi phur viau mah se set hnihnaah Nadal er let a tuar lo teuh hle. Set hnihnaah hian game an inlakchhawk zak zak hnuin tie-break khelh a ni a. Tie-break-ah Zverev a chungnung a, set a la zawn. Set hnih a lak vangin Olympic champion Zverev hian inrintawkna sang zawk nen Nadal a hmachhawn a, a hawi kir tawh lo. Set thumnaah game thum chauh hloh chungin set a la nawn leh a, 6-3, 7-6 (7-5) 6-3 a hnehna changin fiahna hautak a paltlang.
Alexander Zvev hneh lovin tlawm mah se Grand Slam-ah vawi 22 zet champion tawh Rafael Nadal chuan tun hi French Open-a a hun hnuhnung ber tur a ni em tih a hriat bik loh thu a sawi a. Inelna hmachhawn tura kir lehna hun tha tak neia a inhriat thu a sawi.
Nadal hian French Open-ah hian inkhel vawi 116 zet a hmachhawn tawh a, vawi li chiah a chak lo. A elpui lian Novak Djokovic lakah vawi hnih a tlawm tawh a. Djokovic bakah hian Rolland Garros-a a hneh loh awmchhun chu Zverev leh Robin Soderling te chiah an ni.