Chief minister Lalduhoma’n project reng reng Mizoram sum ei hek lo tur chi chu a thei apiangin buaipui se tha an tih thu a sawi.
Nilaini khan Mizoram Journalists’ Association General Hqrs. hruaitute chuan an president C Lalrambuatsaiha hovin Chief Minister Lalduhoma chu a pisa-ah kawmin, an pawl mamawh hrang hrang an thlen.
C. Lalrambuasaiha chuan MJA in hun rei tak atanga an lo beisei tawh Mizoram Journalists’ Pension Scheme chu Mizoram Sorkar-in a taka a tihlawhtlin sak chu an lawm thu an sawi a, hetihrual hian, Mizoram Journalists’ Pension Scheme chu a la famkim tawk loh avangin a tul anga enzui sak tur te, MJA in Press Enclave nei tura hma an lakna chu a hlawhtlin ngei theih nan theihtawp chhuahpui tur leh project an siam chu Mizoram sorkar-in a ngaihpawimawh hmasa, top priority list-a telh sak tur te, Mizoram sorkar-in Advertisement Rules a hman lai chu ennawn a, department hrang hrangin mumal zawka advertisement an kalpui theih nan IPR Department-ah a hlawma budget-ah dah tura ruahmanna siam sak tur leh newspaper advertisement rate, centimetre khata Rs. 130 ni mek chu Rs. 150 aia hniam lo-a tihsan sak tur leh MJA member te tan a tam thei ang ber Press Tour buatsaih sak turin a ngen.
Chief Minister chuan, MJA thu thlen chu a tul anga bawhzui a nih tur thu lo hrilhin, Advertisement Rules ennawn a, department hrang hrangin mumal zawka advertisement an kalpui theih nana IPR Department-ah a hlawma budget-ah dah tura an ngenna chu a hranpaa dilna theh lut tur leh a lo enzui tur thu a hrilh a. MJA in Press Enclave nei tura hma an lakna chu tha a tih thu leh a thlawp thu sawiin, project reng reng Mizoram sum ei hek lo tur chi chu a thei apiangin buaipui se tha an tih thu leh Press Enclave pawh a hlawhtlin theih nan theihtawp a lo chhuah tur thu, MJA hruaitute a lo hrilh a ni.