PHE Minister Prof. Lalnilawma’n tun hnaia ruah sur nasa avangin mumal taka tui sem leh theih nan a thla tel pawh hun an mamawh mai thei niin a sawi.
Nilaini khan PHE Minister Prof Lalnilawma ho hian MINECO-a a pisa-ah PHE department hotute nen MJA Gen. Hqrs. hruaitute kawmin, tun hnaia ruahsur nasa avanga PHE department in harsatna hrang hrang an tawh dan te an sawi a. An inkawmnaah hian PHE Minister hian, ruahsur nasa avanga tui lianin Aizawl khawpui chawmtu tui lakna, Greater Aizawl Water Supply Scheme Phase I khawl thenkhat chu tuiin a chim chu, Thawhlehni chawhnu khan an harsatna tawh dan te an enfiahin a tlawh nghal tih a sawi.
Prof Lalnilawma chuan an rin phak bakin tui lian hian hasratna a thlen a, tui a kam deuh hnuah pawh chirh leh bawlhhlawhin a tihbuai nasat avangin a thenfai chhung ringawt pawh a rei dawn a, mumal taka tui an sem leh theih nan thla tel pawh hun an mamawh mai thei tih a sawi.
Tui pump-na khawl hrang hrang chu a chhiat leh chhiat loh enfiah a ngai dawn a, khawl hi a chhia a nih phei chuan sum tam tak senga siamthat a ngaih dawn avangin Thawhlehni zan khan Chief Minister, Lalduhoma hnenah thil awm dan a thlen nghal niin PHE Minister hian a sawi bawk.
PHE hotute sawi danin, Thawhlehni khan lui lianin, Phase I pump house a chim vek a, chhinchhiah chinah kum 2017 tuilian kha tui chim chin san ber tum a ni a, Thawhlehnia tuilian khan metre 1.5-in a sang zawk a. Lui atanga tui pump chhuahna, Raw Water Pump House mai ni loin, a thlit fimna, Clear Water Pump House thlengin tuilian hian a chim a, hei hian eng angin nge khawl a tihbuai dawn hriat a nih loh thu leh khawl ro hnuah thil awmdan an hriatchian theih chauh tur thu an sawi.
An sawi zel danin, tuilian hian Phase II chu chim ve lo mah se, kawlphetha pekna line a chhiat avangin tui pump theih a ni chuang lo a. Phase II bika hman tur hi Diesel Generator Set thar an neih sa hmanga tui pump dan ngaihtuah mek niin, Nilaini zan atang hian tui pump tan theih an tum a, hei hi a hlawhtling a nih pawhin ni khatah tui litre mtd. 8 vel bak pump theih a nih dawn loh avangin harsatna a sukiang pha dawn lo tih an sawi.
Ni khata tui litre mtd. 37 pump theihna tura ruahman, Greater Aizawl Water Supply Scheme Phase III pawh tuilian hian a chim avangin tui pump theih a ni rih lo tih PHE hotute chuan an sawi a, tuilianin khawl a tihbuai bakah tui a nu nasa a, tui nut zawng tehna NTU 5 chu mihring in tlaka ngaih a nih laiin, tui len laia a nut zawng chu NTU 900 chunglam a nih avangin a thlitfim ringawt pawh buaipui tham a nih thu leh heng chhang hrang hrang vang hian mipui hnenah tui an sem thei rih dawn loh avangin mipuite chu tui renchem tur leh ruahtui khawl nachang hre turin an chah a ni.
PHE hotute chuan, Aizawl khawpui bakah tuilian hian Mizoram chhung hmun hrang hrangah harsatna a thlen thu an sawi a. Saitual khawpui chawm tura Tuivawl tui laknaah kum tin tuilian vangin harsatna a thleng a, tun hnaia tuilian pawhin Transformer a chim a, hei hi a ro phawt loh chuan tui pump theih a ni dawn lo a, Lawngtlai tui lakna Sub-mersible pump hmanga tih pawh tuilian-in a lak thin avanga senghawi a nih avangin tui pump theih a ni lo a. Hnahthial tui lakna pawh fimkhur thilah khawl senghawi a niin, Serchhip tui pump-na pawh kawlphetha pekna a chhiat avangin pump theih a nih rih loh thu an sawi.