Chief Minister Lalduhoma’n department tinin an project duan te chu Planning Board kaltlang zela theh luh tawh tur a nih thu a sawi.
Nilaini khan Chief Minister Lalduhoma chuan a pisa-ah Excise & Narcotics Department hotute a kawm a, Mizoram Ruihhlo Do Core Committee thukhawmin ruihhlo supply titlem tura hmalakna lam (supply reduction) hi Excise & Narcotics Department kutah dah a nih avangin, an hna a tam phah dawn a, mamawh pawh an nei dawn a, sum leh pai pawh in mamawh dawn avangin an dinhmun leh hmachhawp te hriat an duh tih a sawi.
Chief Minister hian sorkar hmalakna puitling zo ta lo sawi tur a lo awm nual tawh a, hmalakna inthuah leh inhnai lutuk te a lo awm ve thei bawk a. Sum leh pai tam tak sorkarin a seng si a. Chutiang chu tih bo an duh avangin department tinin an project duan te chu Planning Board kaltlang zela theh luh tawh tur an tih thu leh an ruahmanna te pawh hi thehlut phawt a, a tul angin an lo zir tur thu a sawi.
An inkawmnaah hian Z. Lalhmangaiha, Commissioner chuan, Chief Minister kan neih tawh te zinga kan office tlawhtu hmasa ber anih avangin lawm thu hriilhin, an hmalakna tur atana thu a chah te pawh an hriat reng thu leh an mamawh leh harsatna te thlen theia hun tha tak a pek avangin lawmthu a sawi bawk.
Peter Zohmingthanga, Jt. Commissioner chuan Excise & Narcotics Department dinhmun, an hnathawh dan, an mamawh leh ruahmanna an siam mek te a sawifiah a. Excise & Narcotics crime & criminal management system siam an duh thu te pawh chipchiar takin a sawifiah a ni.
He huna report a pek danin, kum 1984 atanga vawiin thlengin Mizoramah drugs vanga thi 1842 an awm tawh a, an zinga 1616 hi mipa niin 226 te hi hmeichhia an ni. Kumin 2024 bikah mipa 25 leh hmeichhia 7 an thi tawh. Drugs vanga thi an chhinchhiah zat hi kum 2020 ah 67, 2021-ah 47, 2022-ah 43 leh 2023 ah 74 te an ni. Zu vanga thi hi mumal taka record neih a harsat thu an tarlang.
Tunah hian India sorkar chuan Drugs dona campaign Nasha Mukt Bharat Abhiyan an kalpui mek a. He awareness campaign hnuaiah hian India rama district 272 te chu drugs laka derthawng bik (vulnerable district) a puang a. Mizorama district 6 an tel ve a ni.