Nilaini zing khan NBA Conference play-off final khelh chhunzawm a ni a. Eastern Conference final-ah vawi thum tlawm zawnah Minesota Timberwoves chuan Dallas Mavericks an lehthal a, a vawi khat nan hnehna an chang ve nawlh.
Final game hmasa pathuma chak zawn tawh Dallas Mavericks hian final game linaah bul an tan tha tha lo a, quarter hmasa berah point 7 ngawtin an hnufual nghal. Point 7 zetin hnufual nghal mah se an buai rei lova, an insiamtha thuai. Mavericks hi quarter hnihnaah point 7 a sang zui ve lehin, inhnehtawk chungin chawlhlawk an hmang.
Chawlhlawk hnu lamah inkhel a hmuhnawm zui viau a, chak zawk nih tumin an innawr tawn nasa hle. Quarter thumnaah point 5 in Timberwolves an chungnung. Quarter hnuhnung berah an inhnehtawk leh zual a, point 27 ve ve thawkchhuakin chungnung zawk an awm thei lo. Inkhel hmuhnawm takah final luh beisei zui tura chak ngei ngei mamawh Misenota Timberwolves in point 105-100 in hnehna an chang ta a ni.
Final-ah a vawi khat nan Dallas Mavericks an hneh tum hian Minesota Timberwolves tan Anthony Edwards chuan point 29 a thawkchhuak a. Karl-Anthony Towns chuan point 25 a thawkchhuak ve bawk. Final game 5-na hi zirtawp zingah khelh a ni ang a, Timberwolves in hnehna chan tumin tan an khawh zui leh ang a, an chak lo a nih chuan an tla nghal thung ang. Eastern Confrence final-a chak zawk zawk hian Western Conference-ah 4-0 ngawta Indiana Pacers hnehtu Boston Celtics an hmachhawn zui leh ang.