Bairabi-a Tlawng lui lian avangin hmun him zawk lamah chhungkaw 21 sawn chhuah an ni tawh.
Tlawng lui lianin Bairabi khua hmun thenkhata harsatna a thlente chu Nilaini khan Kolasib Bawrhsap John LT Sanga chuan tlawhin, Bairabi khawtlang hruaitute nen tui lian vanga harsatna tawk chhungkua te chhawmdawl dan tur relin SDO (C) Conference Hall, Bairabiah an sawi ho.
An sawihonaah hian Bairabi khawtlang hruaitute chuan, tui lian avang hian nizan (Thawhtanni) thleng khan chhungkaw 21 chu hmun him lamah sawn chhuah an ni tawh a. Tui lianin lawngte a lak bo loh nan tlaivarin vengtu an indah tih an sawi.
Tlawng lui hi kum 1989, 2008, 2017 leh 2018 khan nasa takin a lo lian tawh a, hemi avang hian kumin fur lo thleng tur atan pawh hian khawtlang hruaitute an lo inhmakhua lawk tih an sawi a. Vanneithlak takin kumin hian chhiatna liam tham thleng a awm loh thu leh chenna in chan an awm rih lo mah se, tui lian hian Tlawng kam a huan siam thahnem tak a tichhia tih an sawi a, ruah a sur belh rih loh avangin tui lian pawh a kam ve zel rih thu, khawtlang hruaitute hian an sawi bawk.
Kolasib Bawrhsap John LT Sanga chuan chhiatrupna a thlen chang a a tul apiang a che chhuak thin khawtlang hruaitute leh tlawmngai pawl hrang hrangte chu khawtlang mipuiin an thlamuanpui hle thu sawiin, sorkar hmalakna a chhanchhuah, tanpui leh chhawmdawl hna tihlawhtlingtute leh tichaktute an nih thu a sawi a. Zo nunze mawi, tlawmngaihna chhawm nungtu ni zel tur a chahin hma an lo lak tawhna chu fakawm a tih thu a sawi a, chhawmdawl hna thawktute mamawh zual phuhruk nan pawisa fai leh silpouline engemaw zah, khawtlang hruaitute hnen ah hian a hlan nghal a ni.