- Rempuia R. Lutmang
Tunlai hla lar ti i la, mi thenkhat beng a thlep deuh mai thei e; a chhan chu, a satu leh a phuahtu vang tea ngaithla duh lo nghal mai chi, ‘lar lo se’ ti nghal deuh tung chi hi kan awm ve zel si a. Chutih rualin, mi lar emaw kan tih, lar tak tak chiah lo pawh an awm thei tho bawk. “Zai thiam lar em em mai,” an han ti a, an han ko chhuak a, a entute’n “Tu nge?” an lo tih sup sup hi an awm fo mai. Tuna kan hla sawi hi chu chutiang ni loin a lar ve deuh tak tak chuan ka hria.
Ka hla sawi hi “Chhingkhualah” tih a ni a, Mary Dawngi’n a sa a, a phuahtu chu Henz a ni. A hla kha mawi ve deuh mai a ni a (hla hi ‘nalh’ tia sawi fiah an awm thin a, tawng dik meuh lo a ni; hla chu ‘mawi’ hmanga sawi fiah a ni thin). Mud hla “Lonely This Christmas” tih nen a inang lek lek a, a mawi ka ti hle. He hlaah hian, “Dar ang tawn ni her leh ang i maw, min nghilh mai bik lo la” tih a awm a, a dik miah lo.
“I” chu chi dang dang a awm thei ang, hetianga kan hman erawh hi chuan mahni insawina a ni zel thin. Kan hla thu sawi lan takah erawh kha chuan ‘amah’ insawi loin ‘dar ang tawn ni’ zawk a sawi a, kha thu khan ‘i’ a chhawm tel ve thei lo. Hetiang hi a tawngkam awm dan zawk chu a ni,
“Dar ang tawn ni her leh ang maw.” (“i” tel lo)
“Dar ang tawn ni her chhuak leh ang maw.” (“i” tel lo)
“Dar ang intawng leh ang i maw.” (amah, anmahni)
“Dar ang tawng leh tak ang i maw.” (amah)
Lilzo hlaah pawh, “Khawiah tuan ta che i maw?” tih a awm a, hei pawh hi a dik lo; “Nang hi khawiah nge ka awm tak?” tih ang deuh a ni a, fel lo deuh a ni. Mi dang a bia a, amah a insawi tel lo a, kan sawi lai mek “i” kha a lo inrawlh ve ngawt thei lo. “Khawiah tuan ta che maw?” tia “i” tel loa hman tur chi bawk a ni. Hming te hi mak deuh deuh kan inphuah chawp a, khuti lam, America lama an mi hangho tih dan kan entawn a ni ber ang chu
Hla dangah pawh, “Engtin tuar i maw, ka hmangaih ka di ve khan?” tih a awm bawkin ka hria. Hei pawh hi, “Nang hian engtin nge ka tawrh?” tihna ang a ni a, a dik thei lo. A hmaa mite nen khan a dik loh dan a inang tlang vek mai.
Hla dang dangah pawh a tam e, an ti. Hla kan ngaithla tlem a, kan hre tam lo. An lo hmang deuh sup a nih chuan thil tha tak a ni thei lo ang. An hla a lar phei chuan a tha lo leh zual. “I” chu hawrawp pakhat ve mai a ni a, hman a chakawm viau thin a ni phawt ang a; hman kan chak thlu ngang a nih pawhin a hmanna dik hi hla phuahtu tuai deuhho hian an zir a ngai a nih hi.