2023-24 season chu a liam ta a, vawiin atangin nipui bazar a inhawng tan. Nipui bazar 2024 chhunga player ngaihven hlawh zual tura ngaihte kan tarlang ang.
- Jarrad Branthwaite (Everton)
Everton Centre-back Jarrad Branthwaite hi season liam ta khan a chetha viau a, Premier League-ah a hming a chher lian hle. Everton tan a chetthat em vangin England squad-ah hmun a chang ta hial a ni. A kum a la naupang a, a pumrua a lian in, thahrui a ngah pangngai viau bawk. EPL ah a chetthat em vangin Manchester United in an ngaihven hle a, FA Cup champion United hian £60-70m vel bawrin lak theih an inbeisei a. Banthwaite hi Manchester City leh Newcastle United te pawhin an ngaihven niin tarlan a ni bawk.
- Alphonso Davies (Bayern Munich)
Canada defender Alphonso Davies hi Real Madrid in an ngaihven a, lak tumin an hel mek. Davies hian Bayern Munich ah kum khat daih contract a la nei a, nipui bazar inhawn chhung hian a chhuak dawn a nih chuan €60m (£52m/$64m) vel bawrin lakchhuah a ngai dawn. Real Madrid hian sum tam tak senga lakchhuah rum rum ai chuan kum khat dang ngah leh det a, 2025 nipui bazar inhawn hunah free transfer in lak an rilruk ta zawk niin tarlan a ni bawk.
- Bruno Fernandes
Manchester United leh Portugal midfielder Fernandes hi Saudi Arabia club ten lak tumin an ngaihven a. German club lian Bayern Munich pawhin lak tumin an ngaihven ve bawk. Club dang ten ngaihven bawk mah se United hian an captain hi chelh ngei an duh ve thung a, Old Trafford atangin lakchhuah a awlai dawn hauh lo.
- Conor Gallagher
Chelsea tana khel tha tak, club tan a khelh that vanga England tana khel phak ta hial Gallagher hi London club lian Tottenham in lak an duh a. Champions League khel tur Aston Villa in an ngaihven viau bawk. Nipui bazar liam taah bazar nana sum seng hnem Chelsea hian sum leh pai inkhuahkhirhna an bawhchhiat loh nan an player hralh an mamawh a. Tualchhung player Conor Gallagher hi hralh an pawiti lo niin tarlan a ni a, a manah £50m ($64m) an chhiar.
- Bruno Guimaraes
Newcastle United tana khel tha thei tak Brazil midfielder Guimaraes hian club lian zawkte mit a la thei hle. EPL champion Manchester City in lak tumin an ngaihven a. Uiawm taka champion zo ta lo Arsenal pawhin an ngaihven niin tarlan a ni bawk. Newcastle ah hian hian contract a nei rei tawh lo va, Magpies tan pawh man to taka hralh theih laia hralh a fuh in a rinawm. Guimaraes hi a lakchhuah theihna zat chu £100m ($127m) a ni mek.
- Viktor Gyokeres
Premier League la khel lo. Brighton atanga championship club Coventry City zawm a, chumi hnuah Portugal club lian Sporting CP zawm zui leh Gyokeres hian season iam ta khan a hming a chher lian hle a, inelna hrang hrangah goal 40 zet a thun bakah assist vawi 15 zet a nei bawk. Sporting Lisbon tan a chetthat em vangin club lian zawk ten an ngaihven hlawm hle a, lak tumin an inchuh viau tura ngaih niin, Sporting Lisbon hian €100m (£85.5m/$108.6m) vel bawr an chhiar.
- Alexander Isak
Newcastle United leh Sweden forward Isak hian EPL season liam taah khan goal 20 a thun, EPL ah amah aia goal thun tam awmchhun chu Erling Haaland leh Cole Palmer te chiah an ni. Newcastle tan a chetthat em vangin ngaihven a hlawh hle a, club lian zawk ten an thlithlai uluk hle hlawm. Isak lak tuma ngaihventu langsar ber chu Arsenal an ni a, Isak hi Newcastle chuan £100m ($127m) an chhiar.
- Joshua Kimmich
Midfielder tawnhriat ngah Bayern Munich leh Germany tana khel tha thei tak Joshua Kimmich hian Allianz Arena-a a contract a hmang zo hnai a. Chona thar hmachhawn turin chhuah a duh niin tarlan a ni. Chhuah a pawiti lo tih thawm a rik rualin club lian ten an ngaihven nghal hlawm a. Manchester City, Arsenal leh Manchester United te chu Kimmich ngaihventu langsar an ni a. La Liga club lian FC Barcelona in lak an duh ve bawk.
- Jamal Musiala
Kum 21 mi lek ni chunga Bayern Munich player pawimawh ni der tawh Jamal Musiala hian Alliaz Arena chhuahsan a duh niin tarlan a ni a, hei hian club hrang hrangte beng a verh hle. Season liam taah Bayern tan goal 12 thun a, assist vawi 8 nei bawk Musiala hi £100m ($127m) velin a lak theih dawn niin a lang a. EPL champion Manchester City in lak tumin an ngaihven a. La Liga club lian FC Barcelona nen sawizawm an ni bawk.
- Michael Olise
Crystal Palace tana khel tha thei tak Olise hian ngaihven a hlawh viau a, club lian leh ropui zawkah khelhna hun tha a nei mek. Olise hi EPL club lian ten an ngaihven fur a, Chelsea chu lak tuma ngaihven zual an ni. Crystal Palace chuan an player pawimawh hi £60m ($76m) aia tlawmin hralh an tum lo bur.
- Victor Osimhen
Napoli leh Nigeria forward Osimhen hian nipui leh thlasik bazar dangah pawh ngaihven a lo hlawh viau tawh thin. Napoli hi season liam ta khan an chetha lova, European competition an khel phak dawn lo. Hei vang hian an forward pawimawh Osimhen hian chhuah a duh niin tarlan a ni. Goal thun thei tak Osimhen hi Paris St-Germain chuan Kylian Mbappe hmunruak luahtu atan lak luh ngei an duh a. Manchester United, Arsenal leh Chelsea te nen sawizawm an ni bawk a, £111m ($141m) zet senga lakchhuah ngai a ni thung.
- Dani Olmo
Barcelona academy La Masia chhuak Dani Olmo hian German club RB Leipzig tan a khel tha thei viau a, Spain player pawimawh zinga mi a ni bawk. A khelh mekna RB Leipzig hi chhuahsan a duh niin tarlan a ni a, hei hian club dangte beng a verh hle. Amah hi chuan a chawrchhuahna Barcelona ah kir leh a duh a, Barca pawh hian lak let an hreh lo niin tarlan a ni bawk. Barca nen an indawrna a tlawlh ta hlauh a nih pawhin club dangin an ngaihven viau bawk a. RB Leipzig chuan Olmo manah hian €60m (£51m/$65m) an chhiar.