Nizan khan Republic Veng Branch YMA Community Hall-ah kum 2024-a HSLC leh HSSLC zirlai titha te chawimawina hun hman a ni a, Bialtu MLA Lalsawivunga, AH &Vety, Art & Culture Minister chuan lawmpuina hun hi a hmanpui.
C Lalsawivunga, Minister chuan, “Zirna a ni emaw, eizawnna pawh nise Pathian kan dah hmasak ber a pawimawh a, Pathian hi kan engkima engkim a ni. Nu leh pa te hi leia kan hmuh theih Pathian an ni a, zirlaiten kan chawimawi a, an thu kan awih a ngai. Nu leh Pa thu awih hi Pathian malsawm dawnna a ni a, a thun awih ila, engkim a fel a ni mai. Ruihhlo leh zu avangin Mizoramin buaina nasa tak kan tawk mek a, heng laka inthiar fihlim tura infuih hi hmanlai thil a nih tawh laiin sawi a la ngai fo hi a zahthlak a, vawiina zirlai leh fing zawkte tan chuan sawi ngai tawh lo hial tura kan hriatsa leh kalsan tur a ni. Tih chhin hian a lehpek a hril avangin tih miah loh hi kan himna a ni a, eirukna thlengin kan tichhin lo tur a ni. Heng zawng zawng laka fihlim hi Pathian tihna a ni a, eirukna huat leh sual kalsan hi kan tih makmawh tur a ni” tiin zirlai pass thar zawng zawngte an kal zelna turah duhsakna a hlan.
Republic Veng Branch YMA Community Hall-a HSLC leh HSSLC zirlai tithate chawimawina hunah hian HSLC pass thar mi 54 leh subject zawng zawnga letter hmute leh HSSLC pass mi 43 leh Subject topper hnenah C Lalsawivunga AH&Vety, Art & Culture Minister ni bawk chuan lawmpuina a hlan a ni.
Lawmpuina (Felicitation Programme) Republic Veng Branch YMA buatsaih hi L.Ramdinliana Renthlei, Branch YMA President chuan a kaihruai a, Branch YMA Treasurer KC Zosangpuii’n Pathian hnena tawngtaina hun hmangin lawmpuina hun hlimawm tak an hmang a ni.