Tun hnaia Cyclone Remal vanga vanduaina tawk a, nunna chante pualin Gospel United Mizoram chuan vehbur an khawn dawn.
Kum 20 dawn indin tawh, Pathian fakna hla satute awmkhawmna, Gospel United Mizoram hian tun hnaia ruahsur nasa avanga vanduaina tawk a, nunna chante pualin Charity Concert chu June ni 6, 2024 (Ningani) zan dar 8 atanga tanin HYVE Aizawl City Hall-ah an buatsaih dawn a ni.
He Charity Concert-ah hian Pathian fakna hla satu duhawm ber ber, tun hmaa kan hriat lar Liandingpuii te, Youth Icon atana thlan hmasak ber Zoramchhani, Mizo Idol lo ni tawh Grace Lalchhanhimi, Praise On ‘super trio’ R Lalrinmawii, Cindy Lalthanpuii leh Zorinsanga te, Salvation Army-in zai intihsiakna an buatsaih Salvationist Vanlalruati, Andrew Laltlankima, TBC Zaithanpuia te leh Stacy VL Muanpuii te bakah zai thiam hrang hrangin hun an hmang dawn a. Hei bakah, zaithiam an zai kar lakah thalai te tana infuihna thu tawi sawite ngaihthlak tur a awm dawn bawk.
Charity Concert neih chhung hian tanpuina pe duha sum thawhte lo dawngsawng turin zaimite hi phone kaltlangin an biak theih dawn a. |anpuina pawisa hi QR Code hmanga pek tur a ni ang.
Gospel United Mizoram chuan, Charity Concert an buatsaih turah hian mahni remchanna theuh atanga lo hman pui a, mipuite chu an thinlunga a lan ang zela luang chhuak turin an sawm nghal a. Charity Concert hi ZONET Cable TV atanga pek chhuah a ni dawn a ni.
Zai turte:
- Liandingpuii
- Zoramchhani
- Grace Lalchhanhimi
- R. Lalrinmawii
- Cindy Lalthanpuii
- Angaihtei Hnialum
- Vanlalruati (Salvationist)
- Vohbik
- TBC Zaithanpuia
- PBK Liankhuma
- Muanpuia (Dream Hunter)
- Lungmuana Chhangte
- Steward Lalrochama
- Jerry Lalrinawma
- Hmingtea Chhangte
- Thawhlehnaniropuia
- Nghaktea Fanai
- Andrew Laltlankima
- Jonathan Lianhna
- Zorinsanga
- Henry Lalliansanga Varte
- Stacy V.L.Muanpuii