Pathianni zing khan boxing a palian huangah inhnek ngaihven hlawh pahnih a awm a, IBF kawnghren hreng lailawktu nih inchuhnaah Daniel Dubois hnehna a chang a. Inhnek dangah World champion hlui Deontay Wilder chu China boxer Zhilei Zhang lakah a tlawm a, boxing chawlhsan a hnaih leh zual.
May thla tir khan Tyson Fury leh Oleksandr Usyk ten palian huanga kawnghren pali an inchuh a. Ukranian boxer Usyk chuan split decision hmanga hnehna changin palian huangah kawnghren pali kawl khawm hmasa ber a ni. Kawnghren pali a kawl khawm hnuin Usyk leh Tyson Fury te hi December 21, 2024 ah inhnek nawn leh turin an inrem zui. Fury nen an inhnen nawn leh dawn vangin a kawnghren kawl mek pakhat IBF belt chhuahsak a ni. Hrengtu nei lova awm mek IBF belt hreng lailawktu tur zawn a ni a, Daniel Dubois leh Filip Hrgovic te an inhmachhawn ta a ni.
Kawnghren inchuhna inhnek pawimawh takah hian Dubois a khingpuiFilip Hrgovic hi round riatnaah a knock out a, hnehna lian changin kawnghren a hlawhchhuak. IBF kawnghren kawl tak tak tur hi zawn chhunzawm leh tur a ni a, Dubois leh Anthony Joshua ten an inchuh zui tura ngaih a ni. Dubois leh Joshua te inhnek hun atan September thlaah ruahman a ni. Palian champion hlui Joshua hian Dubois hnehna kawnghren a la a, Tyson Fury-a’n Usyk a hneh a nih bawk chuan Joshua leh Fury te hian kawnghren pali an inchuh zui a rinawm.
- Wilder a tlawm leh tawh
Pathianni zinga inhnek ngaihven hlawh dangah palian champion hlui Deontay Wilder chu China palian Zhilei Zhang lakah a mualpho a, round ngana lekah knock out in a tlawm. Tyson Fury lakah a tlawm hnua ngaiawh hleithei tawh lo Wilder hian boxing a chawlhsan zui rinna lian tak a awm.
Wilder hian Zhang lakah bul a tan chhe hran lova, round ngaah pawh hian bul ta tha zawk niin, chiang takin a khingpui a hnek fuh a, a nawr buai hmasa. Bul tan tha zawk niin, hnek fuh a tum luatah Zhang counter punch a dawng a, inveng thei lova a awm lai chu Zhang hian chiang zetin a hnek fuh leh chiah a, Wilder a tlu chiang hle. Wilder hi thochhuak leh mah se inhnek zui tur khawpin chakna a nei tawh lova, mualpho takin a tlawm zui ta a ni.
Zhang lakah a tlawm leh tak vangin Wilder hian a ropuina thin boxing chu mualpho tak chungin a kalsan a ngai dawn ta niin a lang.