Set an hloh hmasak hnuah Tuichangchal hnehin Huntharin lungthu an kim a, karliamta Zirtawpni zan khan Ather Pro Volleyball League-ah an champion.
LPS Arena, Falkland-ah 12-7-a sang zawk ni chungin Huntharin set hmasa ber an hloh a, final boruak sangah paukhauh leh zuala inlanin 23-25, 25-23, 25-23, 25-23-in an chak.
Champion-na point thawk chhuaktu Anurag Rawat chuan vawi 36 vaw tlain point 11 a hloh a, a vawingana’n Kuriz Player of the Match-a thlan a ni.
Huntharin set linaah 18-14-a sang tawh Tuichangral pawtthlain kum ruk hnua a vawikhatna’n trophy an la a, tum khat aia tam champion thei awmchhun niin, an vawithum trophy lakna a ni.
Tun final kha Pro Volleyball chanchinah Tuichangral nen tum sarih an intawnna a ni a, Huntharin vawiruk an hneh zawnna a ni nghal.
Season liam ta khan Thutak Nunpuitu Team nen set nga inkhelin uiawm takin Hunthar an tlawm a, final-a an chak loh hmasak ber a ni a; 2023-24 season chhunga Pro Division inelna hmasa MVA Cup-ah final lut pha lovin an tla zui leh bawk.
Coach VL Malsawma Renthlei hoin awmze neiin an intuaithar a, Delhi tlangval Anurag lalutin Pro Volleyball final-a an inlan vawilina a ni a, a tum thumna’na an chak mai bakah, champion phu ber ni chungin tum sarih an khelha chak fai vekin set hnih chiah an hloh.
Tuichangralin an tum ram thleng tura an tawn san lai ber hmangin semi-final-ah an saltanna pakhat atangin an chhuak. Inelna hrang hranga vawi ruk an hneh loh zawn hman TNT lakah set thum faiin an chak a, player-te’n khai rual takin hma an sawn.
Pro Volleyball-a an tel hmasak ber kum 2018-ah Tuichangralin final lut nghalin, league-a set thum set hniha an hneh tawh Hunthar lakah set la loin an tlawm. Tun tumah a vawihnihna’n final lutin, league-a set thum faia an hneh loh tawh Hunthar nen bawk an inhmachhawn leh a, an ngam loh lakah a tlawm zawk bawk an ni zui leh ta a ni.
Nikumah hriat hlawh lo player awm khawmna Tuipuiral tan filawr takin feet 6 leh inchi 5-a sang Anurag inlan mah se an thleng sang zo lo. Kuminah team tha Hunthar tan vawi sarih a khelhah point 188 hlawhin 95 a hloh a, team-in point 93 an hlep thei.
Hunthar an champion tawh vawithuma tel kim vek captain Remsangzuala chu a tum thumna’n
KT Enterprise Best Setter-a thlan a ni.
Anurag tih loha point thawhhlawk Fabian-a’n vawi 96 hlap tlain tum 30 a tisual a, chawimawina ngaihlut hlawh KT Enterprise Mizo Best Player lawmman Panasonic Smart TV a dawng.
Final-a vawi hnih an inlan tawhah Hunthar hneh lo ve vein Tuichangral an tlawm a, chutih laiin mimal chawimawina dawng hnem ber an ni ve thung!
Khawhai tlangval Zomuana’n vawi 102 vaw tlain 37 a paih a, KT Enterprise Best Spiker-a thlan a ni.
Kum ruk hnua final luhpuitu David Aizampuia Fanai chuan KT Enterprise Best Coach chawimawina dawngin, libero atana a hman Lalrinmgheta chuan KT Enterprise Best Reiceiver lawmman a la a; TNT player Zosangzuala chu kum zawnin KT Enterprise Best Blocker atan thlan a ni ve thung.