India inthlanpui atan vote thlak zawh a ni ta a, rin dan lakna hrang hrang atanga a lan dan chuan Prime Minister Narendra Modi chu a zawna a term thun nan a chak leh ngei hmel.
Mi thiamte chuan news agency hrang hrangten ngaihdan leh rin dan an lak hi rin bur tur erawh a nih loh thu leh tun hma pawhin dik lo tak tak a lo thlen tawh thin thu an sawi.
Hetih rual hian Modi-a BJP leh an thuihhruaite chu inthlanpuiah hian hnehna chang leh ngei tura rin tlanglawn erawh an ni.
Inthlanah hian BJP, eptu party lian ber, Congress leh regional party hrang hrangte inbeiin thawh sarih inthlanah hian a beih pawh an inbei nasa hle a ni.
Vote tlate hi Thawhlehniah chhiarin result puan a ni dawn a ni.
India-ah hian parliament-a party mal emaw, tangho emaw bial 272 nei tling chinin sorkar an siam thin.
BJP leh a tanrualpui, National Democratic Alliance (NDA) hian rin dan lakna hrang hrangah chuan sorkar siamna khawp an hmu phak ngei dawn niin an sawi a, bial awm zawng zawng zinga hmun thuma thena hmun hnih chuang an chan phak hial pawh rin a ni.
Vote thlak hun a tawp hnua thu a sawi hmasak berah Modi-a hian hnehna an chang tih a sawi nghal a ni.
“India mipuite hian NDA sorkartir leh tur khawpin min vote tih hi inringtawk takin ka sawi ngam a ni,” tiin X-ah a tar lang a ni.
India hi khawvela mihring cheng tamna ber niin tluklehdingawn 1.4 zet an cheng a, inthlanpui pawh hi khawvela lian ber a ni.
Mi maktaduai 969 velin vote thlak thei an awm a, hei hi US, Russia, Japan, Britain, Brazil, France leh Belgium-a mihring cheng belhkhawm aiin an tam zawk.
Inthlanpui hi April 19 atanga tan kha a ni.
Tin dan thin pangngai angin campaign laiin politician-te an tawng nain an sawi thenkhat phei chu inhnialna siam thei tak a ni hlawm a. Rally, inhnialna, thu pakhat inchuhna leh political party-in thil an kalpui hmanga mi dang pheh thlak tumna a tam a, a tak bakah online-a inbeihna pawh a nasa hle.
Zu zawrh policy kaihhnawiha Delhi Chief Minister Arvind Kejriwal man a ni chuan inthlan chhungin sawi a hlawh hle a, eptu hruaitute pawhin hei hi an sawisel nasa hle.
Eptu hruaitute hian BJP sorkar chu anmahni eptute chu thiam taka hup beh tumin an puh a, BJP erawh chuan chutiang a ni lo tih an sawi ve thung.
Kejriwal-a hi May 10 khan bail-a chhuah a ni a, inthlan atan pawh an party tan a campaign thei a. Pathianni thleng kha bail hun chhung neiin lung ina lut leh tura tih a ni.
Inthlan chhung hian politician leh party worker-ten vote thlakna khawp an tichingpen nia puhna thawm a tam hle a. Muslim-te chuan hmun tam takah vote thlak phalsak an ni lo tih an insawi a, Model Code of Conduct bawhchhiaa inpuhna thawm pawh a tam hle bawk.
Eptu hruaitute chuan Election Commission of India (ECI) hnena BJP laka complaint an thehlutte chuan ngaihsak a hlawh zui lo niin an sawi a, ECI chuan a pha thung.