Pathianni zing khan Prudential Center, New Jersey, United States-ah hlawhtling UFC 302 neih zawh a ni a. Fight ngaihven hlawh berah lightweight champion Islam Makhachev chuan amah a kawnghren chuhpuitu Dustin Poirier chu a rek tlawm a, a kawnghren a humhim. Fight ngaihven hlawh dangah Strickland chuan a khingpui Costa a hneh ve bawk.
Lightweight champion Makhachev hian inhnek thian Poirier lakah inbuan thiam zawk a nihna a chhawr ṭangkai a, ṭha takin bul a ṭan. Round khatnaah a khingpui reh tlawm tum viau mah se a hlawhtling thei bik lo.
Derthawng tak chunga round khatna a pal tlang hnuin Poirier a insiamṭha a, a khel ṭha chho ta hle. Round lina tawp dawn lamah US fighter Poirier hi a khel ṭha leh zual a, chak beiseina thar a nei. Round ngana tir lamah inhnek tawn leh mah se a duh ang ngeiin Makhachev a che ta nge nge. Russian fighter hian a khingpui a keuhtlu a, a thiam thil lantir zuiin Poirier hi a rek tlawm ta nge nge a. A kawnghren kawl mek a humhim nawn leh ta a. Makhachev hi title fight ah vawi nga a chak zawnna a ni a, UFC ah vawi 14 a chak zawnna ni tel bawkin, UFC ah chak zawn rei pathumna a ni.
Hnehna a chan hnuin Makhachev chuan a khingpui Dustin Poirier chu fighter tha tak a nih thu a sawi a. Kawnghren pahnih kawlkawp tuma ṭan a khawh tur thu sawi telin, welterweight kawnghren chuhin, champion kawp a duh thu a sawi tel bawk. Kawnghren a hlawhchhuah zawh loh hnuin Poirier chuan UFC a chawlhsan hnaih thu a sawi a. Fighter tha ber zinga mi a la nih thu a sawi rualin, a chawlh hun tur a puan chian thuai tur thu sawiin a thusawi a tlip.
UFC 302 a fight ngaihven hlawh dangah champion hlui Sean Strickland chuan a khingpui Paulo Costa chu split decision in a hneh a, a hloh tawh kawnghren lak kir leh a tumnaah hma lam a pan. UFC 302 ah hian Middleweight bout-ah Kevin Holland chuan Michal Oleksiejczuk lakah awlsam takin hnehna a chang a. Welterweight bout-ah Niko Price chuan unanimous decision-in Alex Morono a hneh bawk.