Aizawl : Dampa Bialtu MLA Lalrintluanga Sailo-in Inrinni khan a bial chhunga ruah leh thli vanga chhiatna thlenna hmun hrang hrang a tlawh kual a, khaw hrang hrangah khawtlang hruaitu ten an lo ṭawiawm.
Tunhnaia thli leh ruah avang khan Dampa bial chhung, a chuanchung lam Aibawk – Darlung inkarah lei nasa takin a min a, PWD lam hotute chuan kawng thenfai nan hian thlakhat dawn hun hman a ṭul mai theih thu an sawi.
Reiek – Darlung via Kanghmun lam kawng pawh lei a min nasa hle a, Kanghmun lam kawng erawh chu PWD lamin Kanghmun thleng an thianfai tawh thung.
Kanghmunah hian In pakhat a chim a, chim leh mai hlauhawm avangin in panga an ṭhiat bawk. Heng bakah hian Darlungah, in pakhat a chim a, Sabualah in pakhat bawk a chim a, chenna tlak loh, ṭhiah ngai 4 a awm bawk a ni.
Sabual lam hi motor a luh theih rih loh avangin damlo, Kanghmun damdawi in pan tur pawh thalai tlawmngai ten KM 15 lai ke in an zawn a ni.
Bialtu MLA Lalrintluanga Sailo chuan chhiattawkte a tawrhpui thu sawiin, sorkar aṭanga tih ngaite a lo buaipuisak tur thu a sawi a. Silpaulin bandle 15 khaw hrang hrangah a ṭul apianga hman turin a hnutchhiah bawk.