Vairengte Kuhva Society leh Vairengte Police ten Inrinni (June ni 1, 2024) zing khan Assam lama phurh thlak tum Myanmar kuhva ro thahnem tak an man.
Thudawn danin, he kuhva phur tu motor lian, MZ 01AA 6341 hi Vairengre dai a a ding chu ringhlelin Vairengte Kuhva Society hruaitu te chuan an enthla a, Assam lam pana a tlan chu zui ru in police checkgate ah ding lovin a tlan tlang avangin Society hruaitu te leh checkgate duty te chuan an um zui a, checkgate thlangah umphain an man a, Vairengte police station-ah hren mek a ni.
He motor khalhtu Anuar Husain Laskar, s/o Kamrul Haque Laskar, Jamalpur, Cachar dist Assam sawi danin, motor hi Aizawl atangin midangin rawn khalh thla in Vairengte atangin a khalh ve chauh a, kuhva ro bag 190 vel phurin heng kuhva ro te hi tu ta nge a nih a hriat loh thu a sawi.
Hetihlai hian, he motor kal dan tur lo hrilha lo tanpui tu, C Lalremruati, 33, w/o H. Lallungawia, Chhimveng, Vairengte mi pawh Vairengte Police te hian thu zawh fiah turin an hruai ve nghal a, Police hotu te chuan he kuhva ro chungchangah hian Pathianni vek khan criminal complain theh lutin, case an register nghal bawk.
Vairengte Kuhva society hruaitu te sawi danin, tunlai hian Vairengte leh a chhehvel kawngtum hrang hrangah Myanmar kuhva ro tawlhruk a hluar hle a, hei vang hian society member te pawh zan tin duty an in siam thin a, tun hnai pawh khan Vairengte khawchhungah kuhva ro phur motor lian an lo man tawh bawk a, Vairengre Police te pawhin Inrinni khan Phainuamah kuhva ro bag 150 manin court ah an lo thawn tawh bawk.