Ephraim Higher Secondary School chuan nimin khan kum 2024 HSLC leh HSSLC result chhuaka pass tharte lawmpuina hun Vanapa Hall-ah an hmang a, he huna khual lian W. Chhuanawma, MLA, Govt. Dy.Chief Whip chuan, “Zirna hi lehkhathiama inchherchhuahna ringawt tur a ni lova, mithiama inchherchhuahna tur a ni,” a ti.
W. Chhuanawma, Vice President, ZPM chuan, “Lehkhathiam tak, chhawr tlak lem loh an awm thei a, chuvangin zirna hian mithiamah min chhuah a ngai. Chu chu chhungkua mai ni lo, ram pawhin kan chhawr thin a ni.
Zinchhuak turah in ngai ta ila, HSLC leh HSSLC-te hi zinchhuak tura mahni kawngkapui kanna chauh a la ni. Hlawhtling tur chuan thawhrim a ngai a, kan duh leh tum tihlawhtling tur chuan mitinin theihna kan nei a, mahse thawhrimna tel lo chuan hlawhtlinna a awm thei lo. Theih tawp aia nasaa lehkha zira kan thawhrim phawt chuan Mizoram Service mai ni lo, All India Service inziahtlin theih a ni. Malsawm tlaka kan thawh phawt chuan kan hlawhtling ang tih ka chiang a, Pathian pawhin chung mite chu mal a sawm thin a ni,” tiin EHSS zirlaite thawhrimna nena hlawhtlinna chang theuh turin duhsakna a hlan.
Ephraim Higher Secondary School hi Vaivakawnah awmin 2024 HSLC leh HSSLC result chhuakah khan zaah za (100%) an pass a, kum 2018-a he School din a nih hnuah tum khat chiah 100% pass loh tum neiin result an nei tha thei hle a, kumin hian HSLC leh HSSLC a 100% a pass thei school zinga titha ber dawttu an ni.
HSLC leh HSSLC Felicitation programme hi chhawng hnih (1st Session & 2nd session) a neih niin hun hmasa hi Adolf Hitler Sailo, Vice Principal chuan a kaihruai a, hun hnihna nen zai leh lama hun hlimawm tak hmangin zirlaite bakah an chhungten an telpui tha hle a ni.