Nimin, Thawhtanni khan Mizo National Front Party Elected Office Bearer leh General Secretary te chuan Mizo Hnam Runah meeting neiin, Party hmalakna kalzel tur pawimawh tak takte relho.
He hun hi President Zoramthanga chuan kaihruaiin, meeting kalkhawmte hnenah fuihna thu sawiin, kan hmabak kal zel turah inpawhtlang tak leh ṭhahnem ngai taka kalin kan bei tlang anga, Opposition Party kan nihna angin Sawrkar lai khalhngil kawngah leh ram leh hnam thatna tura huaisen leh taima taka beih a tul a. Inpekna thar nen party mipuite khaidin kawngah leh kan hmalakna kawng hrang hranga a hmahruaitu ni tura theih tawp kan chhuah a ṭul a ni, a ti.
Vanlalzawma, Vice President, MNF chuan thusawiin, thuruk vawn kawngah leh rinawmna chungchangah kan lo chin thin dan te vawn nun tlat a tul thu a sawi a, keimahni kan inhriatchian angin, party dang ningkhawng pawh hriatchian a, zirchian a pawimawh a. Nitina kan ram tuamveltu boruak leh thuthang vel te hrechiang thei tura kan hawiharh chhunzawm zel a tul a ni, a ti.
Lalchhandama Ralte, Vice President pawhin thusawiin, General Secretary tinte anmahni zia leh theihna mil tura chanvo leh mawhphurhna siamsak an nih thu leh kan party thiltum hlenchhuak tura theihtawp chhuah turin ruahmanna kalpui a ni. Party leh mipuite inpawhtawnna tura chetlakna kawngah zau tak leh fim tak, chak taka kal turin MNF chu a inbuatsaih chho zel a ni, a ti.
Lalruatkima, Treasurer, MNF chuan General Secretary tin ten an hna chanpuala mawhphurhna te sawifiahin, Department tin ten mahni chanvo theuh hneh taka enkawl a, kaihhruai a pawimawh thu a sawi a. Kil tin ten kan hmazawn theuh su kua a, thapui kan thawh zel a tul a, party inpum khatna leh chakna tura thahrui pawimawh tak an nihna te a tarlang bawk.
Meeting-ah hian inpawh tlang tak leh thahnemngai takin hmalak zel dan tur te sawiho a ni a. Mizoram MLA inthlanpui lo awm leh tura Sawrkarna siam ngei tura thapui thawhchhuah pui a nih tur thu an sawi bawk.