#Zozam Times June 05: Lok Sabha inthlanpuia vote tla te chu nimin khan chhiar zawh a ni a. Mizoram aiawh MP atan ZPM Candidate Richard Vanlalhmangaiha chu hneh taka thlan tlin a ni.

ZPM Candidate Richard Vanlalhmanaiha hian vote 208552 hmuin, vote 140264 hmua amah hnaih bertu MNF Candidate K. Vanlalvena chu vote 68288 in a hneh a. BJP Candidate Vanlalhmuaka’n vote 33533 a hmu a, INC candidate Lalbiakzama’n vote 98595 hmuin, PC candidate Rita Malsawmi’n vote 3793 a hmu a, Independent candidate Lalhriatrenga Chhangte in vote 4706 a hmuh bakah NOTA-ah vote 1893 a tla bawk.

Tuntuma Lok Sabha inthlanpui-ah hian Mizoram-ah polling station 1276-a awm a. Mizoramah vote nei mi 8,61,277 atangin voter 4,87,103 in vote kan thlak a, vote tla hi za zela 56.87 a ni a. Mamit district-ah vote tla tha berin za-a 63.45 a tla a, Aizawl district-ah vote tla chhe berin vote za-a 53.29 chauh a tla a ni.

Mizorama assembly bial 40 a vote tla te chu nimin zing dar 8 atang khan counting centre 13 a counting hall 40 ah chhiar a ni a. Khawzawl district-a Tuichang biala vote tla te chhiar zawhfel hmasak ber niin, zing dar 8:55 ah an chhiar zo a. Mizoram pumpui vote pawh chhun dar 12 hmaa chhiar zawhfel thawkhat ni mahse, nizan lamah result te peihfel chauh a ni.