- Kima Tuallawt
Hlimna leh lawmna te hi I chan tur ve hrim hrimah I lo dah ve tawh thin em? Malsawmna leh vanneihna te hian I thlan khur thleng a zui tur che in I ngai ve thin em? Vanduaina te hi midang chuan lo tawk thin mahse I tawh ve I ring ngai lo em? Harsatna te hi midang chan turah chiah I lo dah thin em? A nih loh zia chu khing ho zawng zawng khi nangmah ngeiin I tawn ve hunah chiah I hrethiam ang.
Vanduai bik riauin I inhria em? I tap thin em? I pian tirh atanga tun thleng kha han chhut la,kan chung a roreltu hi a awm tak tak a nih chuan a thuthlukna hi a rual khai lo thlawt tih chang I nei thin em? I vui thin em? Ka hmelchhe bik si,ka pian a thing si,ka chût si,rual ka pawl lo si,lehkha ka thiam thei lo si,kan rethei si,belh tur kan nei chau si,…….. si,si,si hlirin I indawm kun thin em?
A nih leh heti zawng hian I chhut chhin tawh em? Khing ho letling thawk a, duhthusam famkim a awm mihring hi an awm I ring em?
TIHIAN TI TEH
Khawvel a I mi awh ber ber sawm han thlang chhuak chhin la,mi hmingtha an ni emaw,Infiam thei an ni emaw,lalna leh thuneihna sang tak nei an ni emaw,zai thiam an ni emaw,pian thiam an ni emaw,mi te ngaihsan leh tlawn rawn pawisa ngah an ni emaw,eng ang mi pawh ni se,kar khat chhunga an dinhmun ang a awm theih ni dawn ta se la,emaw,kar khat chhung chhun zan zawmin an engkim tawmin han chenpui chhin teh. Sawm a pakhat pawh I awt zuiin I chenpui zui châk ngut emaw chu. Mitin hian harsatna thahnem tawk tak kan lo nei vek si a.
Khing ho khi,”khati khan lo tizawk ta ila aw,khati khan lo tilo zawk ta ila,ka hnuai a mi te hian sum an duh vang nge kei hi min duhsak ve hrim hrim? Ka motor hnathawk te an haw kim em,ka chhung te hian min thlawp tawk lo,ka mal tan bik riau, naktukah chuan heti tawh zawk hian,chuti deuh,khati deuh khan”,ti a, lehpek,zual zel beisei a let let ve vek,rilru hahna chi hrang hrang in a an mut hmun thleng a hlimthla ang mai a a zui ve tho te an ni asin.
ZAM DUH SUH
Nimin lungngaihna te,vawiin lungngaihna te,naktuk lungngaihna tur chen a lungkhamna hian mi a delh rit a,hneh I tum loh a,I palzam ve deuh loh chuan engtikah mah I hlim thei ngai lo ang. Mi hlawhtlinna I lawmpui thei lo ang a,I tawt up up ang a,thinchhiat ah te,mi zinga awm nuam tih lohna ah te I tlak ang a,I mi awh em em te khian nangmah a thil awm tam tak kha an rawn awt ru em em zawk a ni tih I ngaihtuah duh loh tlat a,I vanneih bik zia leh malsawmna I dawn nasat zia lam I thlir duh loh luih tlat chuan,dam hian I tan awmzia a nei nêp hle ang a,hlu tak leh ropui tak a din I nunna hial pawh I hlut zo lo ang.
DAK CHHUAK VE LA
I inchhir luat vang a siam that leh I chak ngawih ngawih vang emaw,I la thlakhlelh em vang emaw in,nichin mai,minute tlem te kal ta te,nimin lawk te,kum sawm,sawmhnih lai te pawh kha kohkir leh theih se i ti vawng vawng thin em? Hun hian a nghak ve si lo che a,khang hun leh ni te kha chu liam tir la,I nuna I thil tawn ve pakhat,I tawnhriat titamtu ah ngai mai rawh. Chelh rual a ni si lo.
Huaisen la, hmachhawn rawh. Ropui takin I chawr chhuak le lu lo a ni thei,pawi tisuh. Nangmah tal kha chu inhneh la,nun nuam tak insiam teh. Pal thiam la,pawm thiam rawh. I lo piang ve tawh miau si a.
“A chuti bik a,a khati bik a,a sawi huai mai mai”,mi tihlek suh. Tahna ruam atang thoin a ni he thu hi ka ziah ni. Khawvel hian nang aia vanduai leh rethei hi chhiar sen loh fa a hring tawh a,chung ho te tho chu a ni hnehna hla do chham thin te chu.