Pachhunga University College chuan nimin khan an zirlai kal chhuak tur thlahna Graduation Dinner an buatsaih.
PUC Principal Prof H. Lalthanzara chuan fuihna thuchah sawiin, zirlai kal chhuak turte chu an zir zelna turah thiamna hman tlak nei tur leh Mizo hnam tana mi chhenfakawm, ram tana an thiamna leh theihna hlan let ve theuh turin a sawm a ni.
He hunah hian zirlai kal chhuak tur aiawhin Lalnunpuii Hlawndo pawhin thu a sawi a, PUC Music Club leh PUC Dance club atangte in special items thlirhona neih a ni.
PUC-in zirlai kal chhuak tur an thlah, Class of 2024 ah hian zirlai 972 an awm a. Graduation Dinner hi tun hi a tum 17 an buatsaihna a ni.
PUC ah hian tun dinhmun ah UG course hrang hrang 23 leh PG course 5 zir theih a niin, zirlai awm zawng zawng hi 3290 an ni a. Kumin ah zirlai lut thar turte tan admission tih mek a ni a. PUC Entrance Test (PUCET) leh Common University Entrance Test (CUET) hmangin admission hi tih a ni a. Zirlai lut thar 708 awm tawhin, CUET hmanga lut turte tan admission la tih mek zel a ni bawk a ni.