Euro 2024 khel turin ram hrang hrangten inbuatsaihna hnuhnung lam an hmachhawn hlawm. Inrinni zana inkhelah an mikhual Croatia hneh lovin Portugal an tlawm a. An mualah Portugal an tlawm laiin Spain chuan an mikhual Northern Ireland chu 5-1 ngawtin an lo sawp ve thung.
- Portugal an tlawm
Euro 2024 khelh turah pawh team ngaihven hlawh zinga tel phak Portugal leh Croatia te hi Estádio do Jamor-ah an inhmachhawn a, inkhel hmuhnawm an chhawpchhuak. He inkhelah hian mikhual team Croatia in bul an tan tha a, penalty an hmu thuai. Inkhel tan atanga minute 8-na leka penalty an hmuh hi veteran player Luka Modric chuan awlsam takin a pet goal a, hmahruaina goal a thun. Chawlhlawk hmain innawr tawn viau mah se Modric goal thun bak hi goal hmuh belh tur a awm lo.
Chawlhlawk hnu lamah inkhel a hmuhnawm zual a, goal khat ve ve an thun. Second half tan atanga minute thumna lekah Diago Jota chuan goal thunin an si phurh a sut. Goal khat ve ve an thun hnuin Croatia an che fuh hmasa leh a, PenAnte Budimir chuan minute 56-naah hma an hruai nawn lehna goal a thun. Budimir goal thun hi Portugal in sut tum viau mah se hun tawp thlengin an sut thei tawh lova, an mualah ngei an tlawm zui ta a ni.
- Spain an chak nuamsa
Champion tura rinkai zinga mi Portugal an mualah ngei an tlawm lai hian Spain chuan an mikhua Nothern Ireland chu 5-1 ngawtin an lo sawp thung. Estadi Mallorca Son Moix a lenglut N. Ireland hian bul an tan tha viau a, minute hnihna leka Danny Ballard goal thun hmangin hma an hruai. Hma takah goal chhuah mahse Spain an buai lova, chawlhlawk hmain goal li ngawt an thun hman a, 4-1 a hmahruai chungin hma an hruai.
Spain tan hian Pedri chuan minute 12-naah goal thunin an si phurh a sut. Pedri goal thun hnu hian Alvaro Morata chuan minute 18-naah hma an hruai letna goal a thun a. Hma an hruai let hnu hian Pedri leh Fabián Ruiz ten chawlhlawk hmain goal an thun belh a. Chawlhlawk hnu lamah Mikel Oyarzabal chuan an goal ngana a thun zui leh bawk a, an mikhualte an lehthal chiang hle.
- Belgium pawh an chak
Inrinni zana inkhel dangah Belgium chuan an khingpui Luxembourg chu an mualah awlsam takin an hneh a, si thum faiin an sawp.
Belgium tan hian club thar khelhna tur zawng mek Romelu Lukaku chuan minute 42-naah penalty pet goal in hmahruaina goal a thun a. Lukaku hian minute 57-naah an goal hnihna a thun zui leh. Si hnih faia hma an hruai hnuin hun tawp dawn hnaih minute 81-naah Arsenal tana goal pawimawh thun thei tak Leandro Trossard chuan an goal thumna thunin, an chakna a nem nghet.
Inrinni zana inkhel dangah Denmark chuan an mikhual Norway chu 3-1 in an hneh. Denmark tan hian Pierre-Emile Højbjerg, Jannik Vestergaard leh Yussuf Poulsen ten goal an thun a. Norway goal neih chhun hi EPL top-scorer Erling Haaland thun a ni.