Bialnu hlui kutthlakna video a darh huk hnu ah Washington DC-a mihang chanchina zirna In langsar tak Howard University chuan Sean ‘Diddy’ hnena honorary degree a lo hlan tawh chu a lalet.
Heti anga chawimawina ropui tak mai an lakletna ah hian rap mugul chet dan mawi lo tak mai, tharum hmanga hmeichhe âwm nem zawk chunga a chetdan en hrehawm tak chu pawm theih ziazangah ngai lovin, 2014 kuma degree zahawm leh ropui tak an lo hlan tawh chu an sut ta rup mai a ni.
Howard University thuneitute chuan 2014 kum a Diddy hnena degree an lo hlan tawh chu hnialbuaitu leh sawibuaitu awm miah lovin lungrual takin laklet lehnghal tur, tiin thutlukna an siam.
University-in thuchhuah an siamah chuan tunhnaia rapper video darh huk behchhana he thlutlukna hi siam an nih thu te, video an enfiah hnu-a action lak a nih dan thlengin an tarlng a, he thil thlenga mawhphurtu leh a kaikuang ber chu rapper Sean ‘Diddy’ Combs a nih thu thlengin chiang takin an tarlang.
“Tunhnaia Mr. Combs-a khawsak phung lanna video tarlan kha Howard University innghahna leh tobul nen nasa takin an inpersan a, he zirna In ropui takin a chawimawina sang ber a pek nen a inphu mawlh lo.
“He university hian mimal thil angah pawh ni se, engtikawng zawng pawhin tharum thawhna leh tharum hmanga kut inthlakna reng reng a dodal a ni,” tiin an thuchhuah siamah an tarlang.