Copa America khel tura inbuatsaih mek Brazil chuan Inrinni zan khan Mexico an hmachhawn a, inkhel hmuhnawm takah bun pek belh tawp dawp tepa rawlthar Endrick goal thun hmangin an chak. Brazil an chak lai hian Copa America thlengtu tur USA chu an mikhual Colombia lakah 5-2 ngawtin an tlawm ve thung.
Brazil leh Mexico te hi Kyle Field, College Station, Texas-ah an inhkhel a, an inhnehtawk hle. Brazil hian darkar khat tlin hmain goal hnih an thun a, awlsam taka chak tura ngaih an nih laiin Mexico in hun tawp dawn hnaihah an si phurh an sut. An inhnehtawk dawn nia a lan hnuin hmabak nei eng tak kum 17 mi Endrick goal thun hmangin football ram ropui Brazil an chak.
Brazil hian Mexico lakah bul an tan tha viau a, inkhel tan atanga minute ngana lekah Andreas Pereira chuan hmahruaina goal a thun nghal. Hma taka goal an thun vangin phur viau mah se Brazil hian chawlhlawk hmain goal dang an thun belh thei lova, Mexico in an si phurh an sut thei lo bawk.
Chawlhlawk hnu lamah inkhel a hmuhnawm leh zual a, goal nga ngawt a lut. Minute 54-naah Arsenal forward Gabriel Martinelli chuan Brazil goal hnihna thunin an hmahruaina a tizau. Goal hnih an chhuah hnuin Mexico an insiamtha a, goal hnihin an khingpuite an chhanglet. Minute 73-naah Julián Quiñones chuan goal thunin an si phurh a sut then a. Hun bek belh minute 90+2-ah Guil-lermo Martínez chuan goal thunin an si phurh a sut zo. Chak zawk an awm thei dawn lo emaw tih hnuin Brazil rawlthar duhawm Endrick chuan minute 90’+6-naah goal pawimawh zet a thun a, Brazil a chakpui.
Mexico laka Brazil chakpuitu Endrick hi kum 17 chauha upa a ni a, World Cup-a vawi nga champion tawh Brazil tan hian vawi thum khel tawhin, goal thum a thun tawh a, ram tan a chetha vet vet hle.
- USA an tlawm chiang
Inrinni zana inkhel dangah Copa America thlengtu tur USA chu an mikhual Colombia lakah an tlawm chiang hle. Colombia hian mual neitu USA lakah bul an tan tha viau a, minute 19 chhungin goal hnih an thun hman. Jhon Arias chuan minute naah hmahruaina goal a thun a. Minute 19-naah Rafael Borré chuan goal thun zui lehin si hnih faia hmahruai chungin chawlhlawk an hmang.
Chawlhlawk hnu lamah USA in goal an thun hmasa a, Timothy Weah chuan minute 58-naah goal thunin an si phurh a sut then. He goal hian Colombia a chhaihkawlh a, Richard Ríos, Jorge Carrascal leh Luis Sinisterra ten goal an thun belh leh a, USA lakah hian 5-1 ngawtin hnehna an chang.