#Zozam Times June 10: Chief Minister hlui Zoramthanga fapa Ramthansiama’n Aizawl District Court-a criminal complaint a thehluh chungchanga final investigation report chu vawiin khan Cyber Crime Police-in Court-ah an thehlut a. Thubuai dang avanga Jail-a tang mek, Facebook-a David Sailo inti nia hriat, R. Lalchhuanmawia, Zemabawk Galilee Veng chu he thubuaiah hian a hming a lang.

Chief Minister hlui Zoramthanga fapa Ramthansiama (Siamtea) chu Mizoram House, Ballygunge, Kolkata ami hnamdang hminga leia puhna a awm avangin kumin January ni 18 khan Ramthansiama chuan Aizawl District Court-ah criminal complaint a thehlut a. Cyber Crime Police-in chhuizuiin, chhui zo thawkhata an inngaih hnuah he thubuaia inhnamhnawih ni ngeia lang hriat belh an neih avanga Court-in hun a pek belh hnuin vawiin (June ni 10, 2024) khan he thubuai an chhuina final report chu Court-ah an thehlut ta tih Cyber Crime Police hotu ten The Zozam Times an hrilh.

Cyber Crime Police hotu ten an sawi danin, Chief Minister hlui fapa, Mizoram House, Ballygunge, Kolkata ami leitua puhna chungchang chu Zosangzuala (Sena Zote), Phullen-in ‘Phulen Politics’ WhatsApp group-a a post atanga lo chhuak a nih thu an chhui chhuak a. Kumin January ni 11 khan David Sailo inti-in Facebook-ah BALLYGUNGE LEH THUNAWI DANG tih thupuia hmangin hemi chungchang hi a post bawk.

He thubuaia hming lang pahnih zinga pakhat David Sailo inti ni ngeia hriat, kum 43 mi R. Lalchhuanmawia, Zemabawk Galilee Veng chu thubuai dang avanga man niin, Jail-ah a tang mek niin Cyber Crime Police hotute chuan an sawi a. Zosangzuala (Sena Zote), Phullen erawh chu BP sang leh zunthlum nei a nih avanga zin chhuak thei a nih loh thu a sawi avangin a hriselna dinhmun ngaihchan mek a nih thu an sawi bawk a ni.