- Rev. Siamhnuna (Presbyterian)
Hla hian mihring nunah kawngro a su hle mai.Tawng pangngaiin a sawi lan zawh loh miin a vei em em chu hla tawite pawhin chiang takin a sawi thei thin.Hla chu chem hriam ai pawhin a hriam a, silai ai pawhin a chak a, a thleng thui zawk bawk.Silai mu chu hlam zali zanga piah lamah chuan a chak vak tawh lova, a hnathawh lah minute khat let a ni.Nimin lama kahchhuah tawh phei chu chakna nei lovin leiah a tla mai mai a, hla erawh chuan khawvel pawh hel chhuak mahse a da chuang lo.Hmanlaia hla pawhin a dawngtu a zirin chakna chu a ngai rengin a nei a ni.
Mihringa phurna awm hi tingtang ang a ni a.Tingtang chu mumal nei tak a khap a nih chuan hla lawmawm leh lungchhia, hla lungleng te a nih dan tur ang takin a rik chhuah pui thin.Thil eng pawhin a hrui a deh chuan a ri mai a, lunglenna lam hla chuan a ti lungleng a, khawhar zai chuan a ti khawhar a, mihringa phurna awm chu a vel a dektu a zirin a hlimin a lungchhiain a thinur thin.
Saikuti chuan hla phuah leh zai vel a nin avangin a nutapa khaw dang a pem tawh chuan a haw em em mai a.Hmuh rem chan hun huna velh hrep ah a vau thin.Vawi khat chu sa a ai dawnin a uin saikuti chu a sawm ta ngei a.A lo vuak hrep an hlauh avangin saikuti chu a tel ve an phal ta lova,mahse a kal ve ta tho va.An inah chuan sa leh zu chu an lo chen dur dur mai a, luhka a luh pah chuan:
Tualah nghal chhawl a zingtu run emaw,
Satin kap dai sakhmingthang hlei chhung kan ni,
tiin a zai lut a, a nutapa chu a hmin ta em em mai a, saikuti kha nopui pe rawh u a ti ta nghal a.Heta tang hian a nutapa pawhin a ngeina ta em em a ni.
Heng atang hian thu aiin hlain hna a thawk chak zawk tih a lang.Pathian meuh pawh hi tawngtaina leh hla a zawl thluk theih a ni ve bawk a,Baibul ah pawh a thil tum a thulh leh tak thu kan hmuh hi.
Simin ka lo kal e aw Lalpa
Ka sualna ngaidam rawh ti tak taktu ten Lalpa zah ngaihna an zawl thlu nge nge thin.