Thawhlehni khan BJP kaihhruai tangrual, National Democratic Alliance (NDA) hian India inthlanpuiah hnehna changin bial 293 an la.
Inthlan result hi rinlawk ang erawh a ni lo va, BJP hi rin dan lakna hrang hrangah anmahnia sorkar siam thei khawpa chak ni ngei tura ngaih an nih laiin an pha lo.
Result rinlawk loh tak a chhuah avang hian Modi-a leh BJP chu an thawhpui pangngaiten an thlawp zui thei dawn nge eptu tangrualah pakaiin sorkarna an siam zawk dawn tih chiang lovin hun rei vak lo a awm phah nghe nghe.
Zirtawpni khan NDA-a tel party hrang hrang hruaitute chuan Modi-a chu an thlawp thu an puang ta a, an tangrual hruaitu atan thlan nghalin prime minister ni leh thei tur a ni ta a ni.
Delhi-a NDA-a telte an thutkhawm zawhah Modi chuan an thawhpuite hnenah lawm thu sawiin NDA chuan ram thatna tura ro relin hma lam panin an kalpui zel dawn tih a sawi.
“NDA hi kum 30 dawn a kal ta a, hei hi thil pangngai mai a ni lo va, thawhhona hlawhtling ber tiin ka sawi thei a ni,” a ti.
BJP hian inthlanah khan bial 240 an la a, India-a rorelna ina thutna 534 awmah sorkar siam turin member 272 tal neih a ngai thung.
BJP thawhpui zinga a lian pahnih, Telugu Desam Party (TDP) leh Janata Dal (United) (JD(U)) chuan bial 16 leh 12 an la ve bawk a, anni thlawpna nen hian NDA chu sorkar siam thei khawpa chak an ni ta a ni.
Chanchinbu hrang hrangte chuan eptu tangrual, bial 234 lai latute chuan TDP leh JD(U) hi anmahni thlawpa sorkar siampuiah an sawm niin an tar lang hlawm a; mahse, Zirtawpnia BJP thu puanin hei hi a takah a chang zo lo tih a tichiang zui ta a ni.
He chanchin ziah lai thleng hian tangrual sorkar ding tur hian minister tur leh an hna chanpual tur an la tifel lo.
Hetih lai hian an thawhpuite an pawh ngheh theih nan BJP hian ministry pawimawh eng emaw zat chu an thawhpuite an pek ngei rin a ni.
Chanchinbute chuan TDP hruaitu, Chandrababu Naidu-a chuan BJP a thlawp dawn hian an state, Andhra Pradesh-in special status a neih a phut niin an tar lang a. He status hnuaiah hian hmasawnna hna thawhna tur sum tam zawk state-in a dawng thei thin a ni.
Kum 2018 khan thil phutah an inrem loh avangin Naidu-a hian NDA hi a lo kalsan tawh a. Inthlan hma lawk khan a kir leh thung.
A thil phut sawi rik awm chungchangah hian an party erawh chuan engmah sawi an la nei lo.
Nilaini khan Modi-a chuan President Droupadi Murmu-i hnenah bânna a thehlut tawh a, parliament thiah nghal niin hei hi prime minister leh MP-a thlan tharte lak luh theih nana tih a ni.