Aizawl: Tualpui khawtlangin an buatsaih, Chief Minister Lalduhoma chawimawina hun chu Zirtawpni zan khan Tualpui Mual zawlah a kharna hun hman a ni.
Kharna inkhawmah thu sawiin chief minister Lalduhoma chuan hun lawmawm tak an hmang thei chu vanneihthlak a tih thu a sawi a. He hun hmang tura an inbuatsihna kawngah Tualpui khawtlang chuan an theihna zawng zawng an hlan tih a hriatpui thu a sawiin, an chunga khawtlang thatna chu an chhungkuain an theihnghilh tawh loh tur thu a sawi.
Chief Minister hian Tualpui khawtlangin ni khat thil thuah Minister-te kaltlanga thilpek an dawn chu a tam thamin, a lawmawm hle tih a sawi a. Tualpui khua, miin an hriat ngai loh chu tunah chuan mi hriat hlawh a lo ni ta a, hei vang hian ram pum entawn tur an ni tih inhria a, khawtlang inrelbawlna pawh mite entawntlaka kalpui turin a ngen.
He hunah hian Agriculture Minister PC Vanlalruata chuan Tuipui atanga Tualpui Rusi ramah Agriculture Link Road an lai hmasa ber dawn tih a sawi a. PWD Minister Vanlalhlana pawhin Khawzawl atanga Rabung peng kawng chu kumin chhung ngeia siam that an tum tur a sawi bakah, Dy Govt Chief Whip, Tuichang bialtu W. Chhuanawma leh Aizawl South II bialtu MLA Lalchhuanrthanga pawhin thu an sawi bawk.