Vaivakawn khawtlangin an veng chhunga zu leh ruihhlo do beihpui an thlak chu Excise Minister Lalnghinglova Hmar in a hawng.
Inrinni khan Vaivakawn huamchhung Sairang kawngpuiah ‘Zu leh Ruihhlo do beihpui thlak’ hawnna neih a ni a. Hawnna inkhawm neih a nih hmain Vaivakawn khawtlang mipuite chuan Mualdungseiah innghakkhawmin, Zu leh ruihhlo do beihpui thlak hawnna hmun tur panin kawng an zawh a, zu leh ruihhlo an duh loh thu te’n an au rual a ni.
Hawnna inkhawmah Excise Minister Lalnghinglova Hmar, Aizawl West II bialtu MLA ni bawk chuan, Excise minister a nih laia a bial chhungah zu leh ruihhlo hmunpui a awm chu tha lo a tih thu a sawi a. Vaivakawn mipuiin tangruala ruihhlo do an tum tlat chu tha a tih thu leh, ruihhlo do beihpui thlak turin sorkar nen thawhhona tha tak an neih a, theihtawp an chhuah chuan an tum a hlawhtlin ngei a rin thu a sawi bawk.
Lalnghinglova Hmar chuan ruihhlo dona kawngah sorkarin sum leh pai lamah theih anga tanpui a tum thu a sawi a. Vaivakawn Local council hnenah Rs 20,000 pein, a tul ang zelin sum lama tanpui zel a inhuam thu leh harsatna an neih huna biak theih reng a nih thu a sawi bawk.