#Zozam Times June 11: Mizoramah internet kaltlanga pawihkhawihna tuar an pung zel a, hursualna kaihhnawiha inbumnaa tal awka cheng nuai 10 chuang chan te pawh an awm.
Cyber crime Police hotu ten an sawi danin, tunhnaiah sex kaihhnawiha inbumna avanga talbuai an tam chhova, pawikhawihtute hian an mi bum te chu thiam taka vehthlemin, video call hmanga hmeichhiat mipatna lam hawia an chetpuina chu record-in, a hnu ah chu video chu thehdarhah vau letin sum an dil thin a ni.
Heng thubuai chhuitu Police te chuan, pawikhawihtute chu hnamdang, vai kan tih thinte an nih tlangpui thu leh social media ah erawh foreigner anga an inpholan thin thu an sawi a. “An mi bum te hi an ngaizawng der phawt a, thil pek hrang hrang te an thawn a, smart phone te pawh an pe a, an mi bum ten an ring tawk nia an hriat hnuah sex chat an neih pui ta thin,” an ti.
Hetiang anga bumna tawk mipakhat chanchin an sawiah chuan, bum tawk chu a hmel lang chiangin saruaka a che vel video chu pawikhawihtu chuan a lo record a, chu video chu a friend list a awm te thawnah a vau a, mualpho hlauh avangin chumi chuan pawihkhawihtute demand ang ang sum a pe a, cheng nuai 14 chuang a seng hman a ni.
Police te chuan hetianga bum tawk palh an awm a nih chuan a rang thei ang berin Police te punin, FIR te thehlut nghal thei se an duh thu an sawi a. “Sum an pek tawh chuan a tawp thei lo, heng mi te hian an vau chhunzawm zel a, Police an inrawlh vat loh chuan sum an seng ral teuh zel,” an ti.
Internet kaltlanga inbumna hi a hluar zel a, pawikhawihtute hian an hmanraw hman te pawh an thlak zel tih Cyber Crime Police hotute chuan an sawi a. Heng pawikhawihnaa bum tawk zingah mi puitling tak tak, sorkar officer te pawh an tel nia sawiin, pawikhawihtute chu an fin thiam em avangin an mi bum te pawh an hrawl chho zel a, fimkhur a tul hle tih an sawi.
Cyber Crime Police Station-in FIR an dawn an bawhzuiah sum kaihhnawiha inbumna a tam ber zel a, chuta pawikhawihtu, mi bum thintu zinga zaa 70 vel chu hnamdang, Mizoram pawn lam mi an nih thu an sawi a, hengte avang hian pawikhawihtu an man chak hlei thei thin lo niin an sawi a ni.
Internet kaltlanga pawihkhawihna, chhui zui tur a tam chho zel a, Cyber Crime Police Station-in nitin complaint 5 vel dawng ziah ang an ni a. Hetihlai hian thubuai ziaklut kher lova, an harsatna chinfelsak pawh an nei. Harsatna tawk ten thubuai ziahluh loh hram an duh deuh zel a, hei vang hian buaipui ngah viau mahse, thubuai ziahluh tak erawh a number chuan a tlem phah thin.