ZPM chuan an party office-ah chhung inkhawm hun nimin khan hmangin, he huna thusawitu TBC Lalvenchhunga, Adviser to CM chuan, “Sawrkar tha lovin a hrinchhuah zar ZPM-in kan zova, sawrkar mumal leh tha takin lokal nise 15th Finance Commission-a kan sum hmuh ve tur, kum 2021 khan lo tifel vek chu nise tun ang hian kan buai lovang,” a ti.
Adviser to CM TBC Lalvenchhunga chuan, “Sawrkar tha lovin a hrinchhuah zar ZPM-in kan zova, sawrkar mumal leh tha takin lokal nise 15th Finance Commission-a kan sum hmuh ve turte kum 2021 khan lo tifel vek chu nise tun ang hian kan buai lovang. Tunah kan sum hmuhna tur kan la thlang leih leih chauh a ni a, kum khat chiah hun awm tawhah hian chet lakna hun kan nei hman mang dawn lo a ni. Project pipeline-a awmte delay loh a awm mang lova, kan hmasawnna tur leh mipui chanvo tur tam lutuk min chhuhsak a ni. Chuvangin kan sum dinhmun hi a tha lawk thei dawn lova, a luhaithlak hle a ni. Kumina kan sum puk theih chu vaibelchhe 900 a ni a, NABARD atang nen a vaia kan puk theih chu cheng vaibelchhe 1118 vel a ni a, chuta tanga leiba rulh tur kan neihsa chu cheng vaibelchhe 640 zet a ni. Sawrkar inenkawlna tha lo avang khan cheng vaibelchhe 100 zet kan hloh phah a, ka ta emaw tiin a rem rem an phawi hmasak tawp zel avangin vawiin hi kan thleng a, an hnena thleng tur leh pek ngei ngei tur pek theih loh kan la kawl zozaite hi engtin nge ni dawn? Nitin za zelah cheng sarihin a la pung zui a, chutiang chu kan state treasury hi a nih avangin chu dinhmun ata chu kan talchhuah phawt a ngai a ni,” a ti.
TBC-a chuan, “Thil dik lo ti turin mipuite hian kan Minister leh MLA-te hi kan nawr nasa lutuk ang tih ka hlau a. party worker-te pawh kan insum a ngai. Mipui tana ding kan nih angin mipui sawrkar dik tak din kan tum mek a, hei hi rorelna kan kuta a awmchhan pawh a ni. Mi dik lote thawhpuia inhaivur hi kan tih ve tur a ni lova, bul tan turin party mipuiten hma kan hruai a ngai. Sawrkar sum harsat zia hi tam takin kan hrethiam lova, kan leiba chu sawi loh kum 2015-16 atanga K Deposit tlingkhawm ringawt pawh vaibelchhe1300 kan nei a. June 2023 hnulama Central atanga sum lo lut; Nodal Agency leh Department-a lut tur pakhatmah dahluh a awm lova, ZPM kan sawrkar niah khan Ways & Means Advance cheng vaibelchhe139 ba sa, Treasury ruakin bul kan tan a ni. SASCI an tih vaibelchhe 226 an sawite kha Nodal Agency-ah dah a ni lova, khawiah nge MNF sawrkar khan an dah zawh? Bill pek a ngai a, puk chawp a ngaih phah bawk. Kan puk hnuah puk belh a la ngaih phah zel a, kan sum dinhmun hi hrethiam rual kan ni. Vawiin mai ni lovin nakkumah pawh kan sum dinhmun hi hetiang zel a nih chuan that ngaihna a awm thei dawn lova, chuvangin bul tan nan in renchem kan mamawh a ni,” a ti a.
TBC Lalvenchhunga chuan, “Dik taka thawh chuan contract hnate hi a hlawk lem lo. Ba thlauva bultan tan, thawh dik tum si tan phei chuan tih chi pawh a ni lo. ZPM-te hi eiru lo turin kan intiam a, eiruk loh ringawt hi thil har a ni lem lo, mahse kan hmuh phak reng eirute kan hrem ngam si loh chuan he sawrkar thar hian tangkaina pakhatmah a nei lo ang. Mipuiten min beisei dan chu eiruk loh piah lamah dik lo taka hausa leh hlemhle te, chung mite hmasawnna hnuaia awm chu an kham avangin an aiawh turin min dah a ni. Dikna kan tih hi a sawia sawi a ni lova, kan huaisen ngam chuan si loh chuan awmzia a nei lo,” a ti.
SASCI chungchang sawiin TBC-a chuan, “Eng vangin nge MNF-in SASCI ti lapse-a min puh kan tih chuan, SASCI kha thawk hman nise keini chuan March 31 hmain kumina kan Project tur kan thehlut hman vek a, sanction pawh kan hmu hman a ni. July thlaah sanction a thleng hman a, sum an hmuh tawh ber chuan a hna kha semin tender mai se an zo ve hman ni mai tur. Sept.6-ah kan account-ah a rawn lut hman vek tawh a, a thawktu tur thlang thei bawk si lo, a thawktu tur hnenah pechhuak thei bawk si lo, Oct.7-ah back date chawpin an siam a, work order pawh an hum vek. An hnate kha cheng nuai 5, nuai 7 leh nuai 10 te tein hna 1300 velah an sem darh a, an milehsa te tihlawm tum vang a ni a, mipuite hma an ngaih loh zia a lang a, chumi system-ah chuan inhruailut ve lo ila ka ti a ni. Duh nise nikum khan thla khat chhungin thawktu turte khan an thawk zo hman vek ang. MCC hmaa work order an pek hman vek avangin Model code of Conduct-in a phuar ve reng reng lo. Cheng nuai nga man pawh thla thum chhungin an thawk zo hman lova, kan sawrkarah mi pe ru le an rawn ti a, hetiang hi a theih ngawt lova thil kalphung pawh a ni bawk lo. A changtu tur mipuite hnen a thlen phak loh avangin a tisualtu chu sawrna fawng chelhtute kha an ni. Chutiang ni tur chuan keini ZPM te hi mipuiten min duh ve ka ring lo a ni,” a ti bawk.
An party chhung inkhawm hi Lalbiakhlua Renthlei chuan kaihruaiin Upa H.Zoramthanga chuan inkhawm a kaihruai a ni.