Thawhlehni khan Multipurpose Cultural Complex Auditorium, Berawtlang ah EF&CC Department huaihawtin Green Mizoram Day hman a ni a, C Lalsawivunga, Art & Culture Minister in he hun hi a hmanpui.
C. Lalsawivunga chuan,”Green Mizoram Day hi kum 1990 atanga hman tan a ni a, kun tinin thupui thlan neiin kuminah hian “I nunna atan thing phun rawh” tih chu thlan a ni a, he programme hi duhthusam ang takin hlawhtling lo mah se la kawng tam takah a hlawhtlinna hmuh tur a awm a ni. Thing phun hi kan uar deuh deuh pawh a tul a, thing kan phunin awmze nei deuha phun te pawh hi a tul hlein a lang a ni,” a ti a. “Green Mizoram a hlawhtlin theih nan hian department mai bakah NGO hrang hrangte, Kohhran thlenga ngaihtuahna leh thahrui kan segg thin hi a lawmawm hle a ni. EF&CC tum ber chu ramngaw humhalh a ni a, a awmsa humhalh bakah tihpun zelte pawh a tel a ni. Ramngaw mak bakah ramsa humhalhte pawh hi an hnapui ber a ni a, mipuiten an hmalakna hi kan tawiawm thata kan thawhpui a ngai tak zet a ni,” a ti bawk.
Art & Culture Minister chuan,“Kan ramngaw neihte a chereu zel a, hei hi a chhan ber chu kan lo neih dan hi a ni thei angem tih hi zawhna lian tak a ni awm e. Ramngaw chereu hian nghawng tam tak a nei a, tuihna leh ramsa ten an tuar zual bik em aw a tih theih a ni. A ti chereu zawng ni lo va a humhalh zawnga kan zavaia hma kan lak hi a pawimawh em em a ni. Ramngaw a chereu kan tih lai hian Department leh mi thahnemngaite thawhrimna avangin kawng tam takah hma kan sawn ve bawk a,” a ti a. “Kan rama nungcha lui lama awmte, sava te leh ramsa humhalhna kawngah hian kan piangthar chho zel niin a langa, hei hi a lawmawm hle a ni. EF&CC department-in hma theihtawpin la mah se la mipui thlawpna leh thawhpuina tel lo chuan awmzia a nei thei lo va, kan ram leilung enkawlna kawngah theihtawp chhuah a tan la theuh turin Zoram mipuite ka sawm a, tun hun atan mai ni lo vawiina hun hmangtu zawng zawngte hi hmahruaitu ni turin kan in chah duh a ni,” a ti bawk.
He hun hi AK Biswal, IFS, Principal Chief Conservator of Forest in a kaihruai a, H Lalengmawia, IAS, Commissioner & Secretary, EF&CC in programme sawi hawnna hun a hmang bawk.
Hemi hunah hian Mizorama ramngaw leh nungcha humhalh lama thawk tha mimal chawimawina heng mite hnenah hian pek a ni –
1) PC Malsawma, Dinthar Veng West Phaileng, Mamit District.
2) PC Lalrinzuala, Maite
3) H. Zakunga, Sihphir Venghlun.
Aizawl District huamchhunga kangmei venna kawnga thawk tha lawmman chu Lamchhip, Kepran leh Seling khuate hnenah pek a ni a, Kangmei venna lama thawk tha District lawmman chu Kolasib District, Lawngtlai District leh Mamit District ten an la bawk.
Lalbiakzama, Assembly Speaker chuan he hun hi a hmanpui bawk.