- Ruata
Tata chuan an premium hatchback lar, Altroz chi thar Altroz Racer chu tlangzarhin a man pawh an puanzar ta a, Rs. Nuai 9.49 man atangin a intan dawn a ni.
Tata Altroz Racer hi variant thum – R1, R2 leh R3 a awm a, a man tur hi a indawt danin Rs 9.49 lakh, Rs 10.49 lakh, leh Rs 10.99 lakh man te a ni a, heng a man tarlan te hi ex-showroom man a ni. Altroz Racer hi Hyundai i20 N Line nena direct taka inel tura ngaih a ni a, a elpui i20 N Line hi Rs. Nuai 10 (ex-showroom) man bawr atangin a intan thung a ni. Heng a man tarlan te hi Mizorama a man nen a chuan a inang lo hret dawn a ni.
Tata Altroz Racer hian 120bhp power pechhuak thei 1.2L, 3-cylinder turbo petrol engine, 6-speed manual gearbox nena thlunzawm a hmang a. Torque lamah chuan 170Nm a pechhuak thei a ni. A elpui Hyundai i20 N Line hian 1.0L, 3-cylinder turbo petrol engine hmangin 120bhp power leh 172Nm torque a pechhuak thei thung a ni.
Altroz Racer hi a huanga 360-degree camera, ventilated front seat, leh voice-assisted sunroof nei hmasa ber a ni a. A kentel hrang hrang zingah hian 10.25-inch touchscreen infotainment system operating system thar nei bakah 7-inch digital instrument cluster a nei a. Himna lamah Electronic stability control leh airbag paruk chu standard safety feature angin a nei a ni. A chhung hmun hrang hrangah la sena thui hmanga chei a ni a, hei hi sports version lirthei hrang hrangah kan hmu thin a ni.
Tata Altroz Racer hi rawng chi thum – Pure Grey, Avenue White, leh Atomic Orange a awm a. White racing stripe-a cheina chu a bonnet leh a chungah a awm bawk a ni. A front fender-ah hian ‘Racer’ badge kan hmu a, a front grille hi Altroz pangngai aiin a danglam hret bawk a ni.