Nimin khan Aizawl District Congress Committee hruaitu ruat thar te chuan a vawikhat nan Executive Meeting an nei a, he hun hmanpuitu Lal Thanzara, President, MPCC chuan, “Tihtak zeta hma kan lak chuan Congress hi kan tho leh thei a ni” a ti.
“Mi ten, inthlan leh ah chuan Congress an sawrkar leh mai ang an ti thin, kan tanrual chuan kan chak leh thei a ni. Thawhhona boruak a that phawt chuan hlawhtlinna kan chang thei a ni. Kan hotuten mawhphurhna chang tute an ruat hi kan pawm a, kan thawhpui that chuan kan hlawhtling ang tih ka ring”.
“Congress sawrkar hnathawh tawh te hi thenkhat chuan an hre lova, hmasawnna hnathawh ropui tak tak te hi Congress sawrkar hnathawh a ni a, kan hun kal tawhah kan hnathawh hi a ropui a ni. NLUP te pawh hi a chhawrtu tam tak an awm a, chung te chu a chhuanawm a ni.
“Remna leh muanna lo thlenna tura Congress party hnathawhnte kha a hlu em em a, rambuai la hre pha lo chuan an hrethiam lo a ni. Chuvangin kum 36 chhungin engmah an ti lo tih hi chu a dik lo a ni.” a ti.
Lalnunmawia Chuaungo, Sr Vice President pawhin thusawi in, “ADCC hi MLA bial 28 enkawltu in ni a, in pawimawh em em a ni. Hma in lak tak tak a, theihtawp in chhuah chuan Congress hi kan tho leh thei a ni. Tun hun hi in siamthat hun a ni a, tun hi hi tanlak hun a ni.” a ti.
Dr. Lalmalsawma Nghaka, Treasurer, MPCC pawhin thusawi in, “ADCC hi in fakawm hle a ni. Hruaitu thar kan inruat a a, engmah sawiselna leh lungawilohna awm lovin, kan hotu thar te in thawhpui thei hi in fakawm a ni. In taimak a ngai a, taima taka in thawhchhuah chuan kan hlawhtling leh ang.” a ti bawk.
He hun hi Lalhmingthanga Pachuau, President ADCC chuan a kaihruai a, C. Vanlalruata, Vice President ADCC chuan hunserh hmangin, RL Vala, Vice President, MPCC leh Lalroenga, General Secretary MPCC, i/c ADCC te chuan thu an sawi bawk a, Vanlalhmangaihzela, Vice President ADCC chuan introduction a, vote of thanks F. Lalhmingmawia, Treasurer ADCC in a nei bawk a ni.