Congress Party chuan Congress Bhavan-ah ‘Friday Political Session’ nimin khan an hmang a. He hunah hian MPCC Sr Vice President Lalnunmawia Chuaungo chuan, “Ram rorelna tha ah chuan mitin an changkang a, chhungtin an changkang a, a ralmuang em em thin. Ram rorelna dik awmna ramah chuan mipuiten a zar an zo a, a rah an seng a, hma an sawn thin. Mizoramah pawh mipuite tuihalna chu rorelna dik leh tha a ni, chu chu kan pek a ngai a ni. Ram rorelna tha awmlohna ah chuan buaina leh retheihna a nasa em em thin tih kan hria a, chutiang chu kan thlen tir tur a ni lo,” a ti.
Nunmawia chuan, “Congress Party hi ram rorelna chelh leh turin kan inbeisei a, chutih rual chuan ‘Congress Party in enge rorelna fawng chelh a tulna’ tih hi kan inzawh fo a ngai a ni. Ram mipuite leh Ram hmasawmna hi kan dah pawimawh hmasa ber tur a ni. Chu chuan kan society leh kan chhungkua ah hmasawnna a thlen ang,” a ti a.
“Congress party hi Mizoramah Mizorama remna leh muanna a awm theih nana thawhhlawk ber kan ni a. A mimal takin Pu Lal Thanhawla khan a thawhhlawk ber niin ka hria. Rambuai hrehawm zia kha hre lo tamtak an awm tawh a, zanah pawh a inkhawm theih loh a, curfew karah kan khawsa a, kan rethei em em thin. Tunah chuan kan lo zalen ta a, remna leh muanna a lo thleng ta a. Congress party zarah remna leh muanna a lo thleng ta a ni.
“Tunhma ngaihtuah chuan hma sawn tak kan ni. Town Bus a chuan te kha mi nazawng tan a theih loh a, tunah chuan Aizawl City Bus ah pawh kan chuang peih tawh lo. Hun hi a inher zel a, hma kan sawn zel a. He kan hmasawn zelna leh hun inher zel hian mipuite duhzawng a inthlak zel ani tih kan hriat a tul a ni.
“BJP in Centralah an rorel dan kan hria a, BJP paihthla thei party chu I.N.D.I.A Alliance, Congress Party kaihhruai a ni. Mizo mipuite hian Congress min support turah kan lo ngai a. Chu chu kohhran hruaitu leh mi tamtak in kan hnenah pawh an sawi a ni. Candidate tha tak kan nei a, kher neuh neuh pawh dawl tak a ni chungin, mipuite hian chutiang lam chu an lo hawi lo hle a lo ni a. Mizo mipui te hian kan ngaihtuah chian a ngai hle a ni.” a ti bawk.
Benjamin Thansanga, General Secretary, MPCC pawhin thu sawi in, “Politic ah hian huaisen a ngai a, huaisen lo chuan zuitu an nei ngai lo. Keini pawh huaisen ila, mipuiin min zui ang. Dik leh tha takin hna thawk ila, party ah rinawm tlat ila, i beidawng lovang u. Hma kan la zel dawn a, MP inthlan leh ah chuan I.N.D.I.A hian sawrkarna a la ngei ang,” a ti bawk.