Prime Minister Narendra Modi chuan Lok Sabha inthlanpuia a kaihhruai tangrualte hnehna a chanpui hnua a vawi khat nan, party tin aiawh intawhkhawm, all-party meet chu nimin khan a ko va, inkawmhona hlawk tak an hmang niin a sawi.
BJP leh a kaihhruai tangrual, National Democratic Alliance-in hnehna an chan hnua hetiang meeting hmasa ber leh parliament budget session hmaa inkohkhawm pawimawh an neih zawhah hian Modi chuan, “Vawiin khan all-party meeting hlawk tak neih a ni a, inthlan result a chhuah hnu leh Fur Thutkhawm tan hmaa neih a ni a. Hruaitute thu rawn tha tak tak avangin ka lawm a, Parliament inkhawm tluang taka neih theih kan tum theuh va, mipuite duh ang tihpuitlin kan duh vek a ni,” tiin Twitter-ah a sawi.
Rorel laite hian parliament-ah hian party dangte thlawpna an mamawh ve hle tho va, a bikin rorelna in sang zawk, Rajya Sabha-ah a tlem zawk an nih tho avangin bill pawimawhte a tlang theih nan party dang an hmin a ngai a ni.
Lok Sabha-ah chuan member 545 awm theihnaah NDA hian MP 303 nei mekin an ngah hle a, in sang zawkah erawh member 245 awm theihnaah MP 102 chauh neiin eptute aiin an tlem zawk a ni.
Hetiang a nih avang hian Lok Sabha-ah bill pawimawhte tlang ngawt mah se Rajya Sabha-ah an tihtlang theih loh phah thin a, sorkar hmasaa bill langsar tak, ‘Triple Talaq’ an tih pawhin in sang zawk hi a la paltlang thei lo va. He bill hi BJP-in an thawhpui, Nitish Kumar-a kaihhruai Janata Dal (United) ngawi pawhin an duh lo a ni.
Lok Sabha inthlanpui neih zawh takah khan eptute an che chhe hle tih chu a hriat a. Eptu lian ber ni reng thin, Congress meuh pawhin Opposition Leader chanvo an chang phak lo bawk.
Rahul Gandhi kaihhruai Congress hian bial 52-ah chauh hnehna an chang a, house pahniha an hruaitu (leader) tur pawh an la puang lo va. Gandhi erawh chuan Lok Sabha-a an party leader nihna erawh a chelh rin a ni.
Hetih lai hian Gandhi hian an party chief nihna kalsan a duh reng a, rorelna ina leader nihna chungchang pawh a la sawi ri lo va. Party-a a nihna hi a kalsan a nih chuan leader pawh a ni lo ve thei tho bawk.
Rorelna in hniam zawk, Lok Sabha-ah hian Gandhi-a team hian member an thawh hrawl tawh lo hlawm hle a. Jyotiraditya Scindia chu inthlanpuiah a tling lo va, Sachin Pilot lah chu Rajasthan-ah Chief Minister Ashok Gehlot-a deputy a ni daih tawh bawk si a ni.
Nimin chawhma lama all-party meet-ah hian Minister of Parliamentary Affairs Prahlad Joshi leh a thachhangdawltu, Arjun Ram Meghwal te, Defence Minister Rajnath Singh te, Congress atangin Ghulam Nabi Azad leh Adhir Ranjan Choudhary, Trinamool Congress atangin Sudeep Bandopadhyay leh Derek O’ Brien leh National Conference patriarch Farooq Abdullah bakah party dang aiawhte an tel.