- Lallunghnema, Charity Lodge
Chibai tha ber ka bûk a che u.
Thawhtanni kan lo thleng leh ta! Thawhtanni a nih angin thawk tan leh mawlh mawlh mai ang aw! Mi taima tan a phûrawm ang a, thatchhe tan erawh ngui rawihna tham a ni ngei ang. Nang pawh mi taima i nih ngai chuan hlim takin, hna thawk turin in buatsaih la, a tha mai! Mahse,consumer tam tak tan erawh chawlhkar tha a ni leh pek lo ang ! Consumer tam tak chu a tlawm leh a mawi chauh thlirin in bazar leh ngei dâwn a. Thil thil tha ngaihtuah lêm lovin in bazar leh ngei ang. Bumin in awm ang a, bumin in awm tih erawh in hre leh pek lovang. A man dik tak aia sangin thil in lei ang a, rawk(robbed) in nih erawh in hre hauh lovang! A va thin nat thlâk thin em!
Mipuiin consumer awareness kan neih zel theih nan tunah hian message ka hmuh thenkhat te kan pho chhuak leh a. Insawi ropuina a ni lo tih erawh min hriatsak ka beisei. Hei le!
“Sir, nizan Airtel chungchanga rawn betu che kha ka ni a. Hei in hming kan lam rik chuan vawiin lamah hna ngawrh zawk a Airtel lam ten rawn thawkin Internet Signal pawh tlêm tlêmin kan hmang ve thei ta e. Mahse, an la siam tha famkim lo va hma ngawrh zawkin an chhunzawm zel dawn tih chu Airtel lam atangin min rawn hrilh bawk e. In hming kan lam rîk pawn hmasawnna pakhat kan hmu a. Ka lawm tak zet zet a ni.
“Eng emaw harsatna te a awm a nih chuan i hnenah chanchin ka rawn thlen leh mai dawn nia. In tel lo chuan keinin hmalak thui ngaihna kan hre si lo.”
From: Hming thup, Melriat.
Ka chhanna : Kan thawkho zel dawn nia.
Comment : Mobile phone service provider te hian an subscriber-te lakah mawh an phur lian hle a. An subscriber te zara nung leh chê an ni tih hi an hre chiang hle tur a ni. Subscriber te tihlâwm chu an mawhphurhna a ni tih hre mawlh rawh se.
Hei pawh:
“Visal joint ni 27th March May ni 2 thlengin a thawk a, an hlawh hi April 30-ah lut turin an sawi a, mahse a lut lova, May 15-ah a lut ang an tihsak a, a lut leh lova. May 31 nghak rawh, a lut ngei ngei ang an ti leh a, ngawi rengin kan lo nghak a, mahse, a lut leh chuang lova. June ni 3 ah chuan a lut ngei ngei ang, an ti leh a, vawiin thlengin lut tih a la awm lo. Chuvangin, dan hre mi te puihna hmanga, a hlawh hmuh theih beiseiin complaint hi ka lo theh lut ta a ni”.
From:Hming thup.
Zonuam,Aizawl
Action : Zonuam lama kan naute hi phone sak an ni a. Visal Manager Muna Lal kan bia a. June thlaa tihfel ngei ngei an tum a. Fel turah kan ngai a ni.
Hetiang hi kan han buaipui a ni a,a thlawn leh nghalin.A hah thlâk ve hle asin. Consumer-te tan kan awm mai mai lo.
Consumer-te zalenna atan kan thu mai mai hek lo.
Tunah chuan kan thupui dangah kan lut tawh ang.
Hei hi lo chhiar teh u….
“Consumer Commission pakhat chuan Flipkart Internet Private Limited chu bungraw chah loh zawk an pek avangin an customer hnenah Rs. 13799 refund turin a ti.”
Hei hi consumer tan hnehna hlu tak a ni. He pawisa an chawi bakah hian Flipkart chu Rs. 10000 compensation chawi tura tih an ni bawk.
Hei hi thil thlen dan chu a ni. Kum 80 mi Mr.Choudan a chuan Flipkart compan-ah nikum 2023 khan TREADMILL Product a order a. Chu a Treadmill chah chu a lo thlen hnuah chuan an han an dik a.
Chu Khâwlah chuan ‘defect’ a lo awm a. A dah let (returned) ta a ni. Flipkart Company chuan chu khawl chu “Kan lo enfel ang e, technician pawh kan rawn thawn dawn nia”, an ti a. Mahse Flipkart chuan engtin mah an buaipui zui ta lo a ni.A va thinrim thlak dawn em! A tawi zawngin sawi ila,he Vai putar huaisen tak Thoudon-a lungawi lo chuan Bangalore Urban ll Additional District Consumer Disputes Redressal Commission hnenah Flipkart hi a khing ta a ni. Consumer Commission hian he company thil tih dan chu Consumer- te dikna leh chanvo tihchhiatsakna niin a ngai a. Deficiency in Service a awm ngeiin a hre bawk a. Chuvangin Flipkart chu treadmill man atana an hnena an lo pek tawh Rs 134799/- chu refund tur leh compensation Rs. 10000/- pe turin a ti ta a ni.
Vai putar hi a felin a huaisen hle.Thil dangah a changkang lo mai thei.Mahse,consumer a nih angin ani chuan a right a hria a,a rinawmin a fel a,a huaisen a nih hi!,ka u Dawng! Nang pawhin he Vaipa ang hian ti ve rawh! Keini inti changkang Mizo ho hian kan tluk lo tak zet kan ti em?
Tun tuma ka thu leh hla hi a tawi viau!mahse, a tha a ni, ka ti.
Note: He ka article hi chatuan ram min pansan tawh Consumer field-a ka thawhpui, ka thianpa Pu V.L . Râwna SDO(Rtd ) Ramhlun North pa lar hriat reng nan ka hlan e – llh