Inrinni zing khan NBA final thawh lina khelh a ni a, champion beisei zui tura chak ngei ngei mamawh Dallas Mavericks in hnehna an chang a, Celtics chelhin, champion beiseina an la nei.
Final game hmasa pathumah an tlawm zawk tawh vangin Dallas Mavericks hi game linaah chak ngei ngei an tum a, an chak lo a nih chuan Celtics an champion nghal dawn. Champion beisei zui tura chak ngei an mamawh vangin chak tumin tan an khawh a, bul pawh an tan tha viau. Quarter hmasa berah point 34 lai an thawkchhuak a, point 13 ngawtin an chungnung nghal. Bul an tan that vangin an phur viau a, an khel tha zui viau bawk. Quarter hnihnaah point 13 bawkin an chungnung zui leh a, point 26 a hmahruai chungin chawlhlawk an hmang.
Chawlhlawk hnu lamah pawh Mavericks an khel tha chhunzawm a, Celtics chelh rual lohin an inlan. Quarter hnuhnung pahnihah pawh an chungnung zui leh ta mai a, point 38 ngawtin hnehna an chang zui ta hial a ni. Game linaah an chak ve tak vangin Dallas Mavericks in Celtics champion tur an chelh a, champion beiseina thar an nei. Champion turin khelh hmabak la awm pathumah an chak vek a ngai tawh thung. NBA Final-ah hian 3-0 a hmahruaitute lehthal an la ni ngai lova, an lo champion tawh thin. Mavericks hian game thum an la zawn thei a nih chuan NBA-ah hnuhma thar hnutchhiah in, ropui takin an champion ang.
Inrinni zinga an chak tum hian Mavericks tan Luka Doncic chuan point 29 a thawkchhuak a, Kyrie Irving pawhin point 21 a thawkchhuak ve bawk.