Aizawl : Adviser to Chief Minister (Finance & Planning), MLA TBC Lalvenchhunga’n Inrinni khan Kelkang-ah YMA Day a hmanpui a. Kalkhawmte YMA Day chibai bukin, ngaihhlut tur dik tak ngaihhlut leh ngaihsan tur dik tak ngaihsan nachang hriat deuh deuh a pawimawh thu a sawi.
Kut tling lova sum la leh hlepru thinte dinhmun thaa dah an ni leh ngaihsan an hlawh thin chu sim a tul thu sawiin, YMA member leh Zoram mipuite chu hlemhletna leh ruihhlo do kawnga tan la theuh tura a chah bakah nuam tih zawngte pela pen chhuak ngam turin a fuih bawk a. Ruihhloin thalaite a ei chhiatzia leh tanlak a ngaihzia tarlangin, zoram mipuite chu theihtawp chhuaha ruihhlo do chhunzawm zel tur leh sawrkar hmalaknate tha taka thlawp tlat turtein a sawm nghal bawk.
Kelkang khuaa YMA Day lawmna hun hi H. Vanlalrimawia, President, Kelkang Branch YMA chuan kaihruaiin Rosang- zuala, Secretary-in inlawm- na thu a sawi a. Kumpuan thupui ‘Ram leh hnam humhalh’ tih chu T. Lalhipliana’n a sawifiah a. YMA thuthlung sawiho niin, hlado chhama intihsiak a ni a. He hunah hian Kelkang khawtlang chuan an khawchhuak TBC Lalvenchhunga chawimawina hun an hmang bawk.
Hun hman zawhah Adviser to CM (Finance & Planning) chuan Kelkang NGO hruaitute leh VC te kawmin hun a hmanpui a. Chawhnu lamah intihsiakna hrang hrang buatsaih chhunzawm niin, hlim takin YMA Day pual ruai kilho a ni.
YMA Day 2024 pual hian Kelkang Branch YMA chuan programme hrang hrang a siam a. Intihsiakna chi hrang hrang 21 hmanga inel a ni a, zan lamah intihsiakna neih chhunzawmin, result puan leh YMA Day kharna inkhawm an hmang bawk a ni.