Football hmanga inelna ngaihhlut hlawh ber pawl Euro 2024 khelh mek a ni a, Pathianni zan khan a ni thumna khelh niin, Netherlands, Poland, Denmark, Slovenia, England leh Serbia te an inlan. Inkhel pathuma chanchin ngaihnawm zual kan tarlang ang.
- Poland 1-2 Netherlands
Football ram ropui zinga mi Netherlands chuan Poland hmachhawnin bul an tan a, 2-1 in hnehna chang tho mah se beisei angin an khel tha tawk lo. Poland an hneh tum hian ram tana chetha thin Wout Weghorst chuan mual chhung a luh hnua ball a tawh hmasak berah Netherlands chakna goal a thun nghal. Juan Valeron (36 seconds) hnuah Weghort hi mual chhung luh hnua goal thun rang ber a ni.
Weghorst hian bench atanga lut chungin Netherlands tan goal vawi thum a thun zawn tawh a, ram tan goal a thun hnuhnung pakua zinga pasarihte hi bench atang luta a thunte an ni nghe nghe.
Zirtawp zana Euro 2024 khelh tan takah hian match hmasa pangaah game tinah goal thum lut ziah ang a ni a, Euro chanchinah game hmasa pangaa goal luh tam ber tum a ni. Euro khelh mekah hian Pathianni zan thleng khan goal 19 a lut tawh.
- Slovenia 1-1 Denmark
Euro 2020-a an game hmasa berah Denmark midfielder Christian Eriksen chuan a nunna a ch^n teuh hle a, inkhel chhun leh thei tawh lo tura ngaih a ni hman hial. Euro 2020-ah nunna chan teuh tak kha Euro 2024-a an match hmasa berah goal hmahruai thuntu a ni leh ta hial a, chanchin lawmawm a thleng ve ta thung.
Slovenia nen 1-1 a an inhnehtawk tum hian Denmark defender Andreas Christensen chuan ball a pekchhuah 89 zet a tidik a. Euro 1980 hnu lamah 100% pass dik awmchhun a ni.
- Serbia 0-1 England
Player ngaihven hlawh Jude Bellingham chuan Serbia lakah England chakna goal a thun. Bellingham hian kum 21 a pelh hmain inelna lian pathum; Euro 2020, World Cup 2022 leh Euro 2024 te a hmachhawn a. Europe player awm tawh zawng zawng zingah kum 21 pelh hmaa inelna lian pathum hmachhawn thei awmchhun a ni. Bellingham hi kum 20 leh ni 353 -a upa a ni mek.
England leh Serbia te khan shot an nei tlem dun hle a, shot ngah zawk Serbia in shot vawi 6 an nei a, player nei tha England in shot vawi 5 chiah an nei. Inkhel pumpuiah shot vawi 11 chiah awm kha Euro 1980 hnu lamah Euro match khata shot tlem ber tum a ni.
England khan Euro an hmachhawn hnuhnung vawi 5-a an game hmasa berah goal an chhuah lo vek a. Hei hi Euro record a ni ve thung.