Euro 2024 khelh mekah champion tura rinkai France chu Austria hmachhawnin an inlan a, beisei an phak loh zanah harsa takin point thum an hmu. Thawhleh zana inkhel dangah Romania chuan si thum faiin Ukraine an sawp ve thung.
- Mbappe tan a har zel
World Cup hnuhnung pahniha final lut zawn thei France chuan Euro 2024-a an game hmasa berah Austria an hmachhawn. World Cup aia Euro harsa ti zawk Kylian Mbappe tan Euro a har chhunzawm a, goal a thun thei lo tluang zel. Austria an hmachhawn tumin Mbappe hian a hnar ruh a titliak a, inkhel a hmachhawn leh hunah hmai kawr a vuah a ngaih phah dawn.
United manager lai lawk lo ni tawh leh Bayern Munich in an manager thar atan an awh Ralf Rangnick enkawl Ausria in beisei phak baka thain France lakah bul an tan a, team lian lakah mit la takin an inlan. France lakah hian 51.9% ball an chang a, ball chang tam zawk an ni hial. Forward hriam deuh nei se Austria hian hnehna an chan theih hial a rinawm.
Inkhel hmuhnawm takah hian goal lut a awm theih loh reng hnuin Austria an vanduai a, an mahni lamah an ti-goal. Kylian Mbappe cross hlauhawm tak chu centre-back Max Wober chuan minute 38-naah an lamah a ti-goal a, France hmahruaina goal a thunsak. He won goal hmang hian France in 1-0 a hmahruai chungin chawlhlawk an hmang.
Chawlhlawk hnu lamah inkhel a hmuhnawm zui viau a, player nei tha France in Austria an paltlang hleithei lo. France tan hian N’Goko Kante a langsar leh viau a, mual chhung hmun tinah hmuh tur a awm a ni ber mai. Ram tan kum hnih dawn a khelh loh hnuin Kante hi ram tan a inlan leh ta a, Deschamp-a player pawimawh a nihzia Match of the match a nih hmangin a lantir. Kante tih lohah chuan France tan William Saliba a khel tha viau bawk.
- Romania an chak chiang
Thawhtan zana inkhel hmasa berah Romania leh Ukraine an inhmachhawn a, inkhel hmuhnawm takah Romania in si thum fai ngawtin hnehna an chang a, khawvel an barakhaih chiang hle.
Romania tan hian Nicolae Stanciu chuan minute 29-naah hmahruaina goal a thun. Cawlhlawk hmaa goal a luh belh theih loh hnuin Razvan Marin chuan minute 53-naah an goal hnihna thunin an hmahruaina a tizau a. Minute 57-naah Denis Dragus chuan a tawp a khar a, kum 24 hnu zetah Euro-ah hnehna an chang.