Nikum April thlaa tlangzarh a nih atangin Maruti Suzuki compact crossover changkang leh mawi tak Fronx chu nuai 1.5 hralh a ni ta a, India rama lirthei hralh kal ber te zinga mi a rawn ni tawh a tih theih awm e.
Maruti Suzuki chuan Fronx hmang hian lirthei huang lar lo leh India rama passenger car-ah pawh company hrang hrangin an neih tam loh crossover huang an rawn lut a. A nihna takah chuan market-a a kal ringin risk an rawn la ve te pawh a tih theih awm e. Company hlun leh ropui chuan an tisual lo ta nge nge a, Fronx hi an hralh chak ta em em mai a, heti zat hi kum 1 chuang awrhah an hralh ta a ni.
Maruti Suzuki Fronx hi tuna chhuak mek, Maruti Suzuki premium hatchback, Baleno nghahchhana duan a ni a. Baleno hi SUV ang deuh turin thawm a ni tih te pawhin mawl deuh chuan kan hrethiam thei ang a. Kawng tam zawkah Baleno nen hian a siamphung, a khawl leh kentel te a inang a ni.
Tichuan Fronx hi financial year 2024 chhung, hmun li (Quarter) a thenah Q1 chhungin 26,638, Q2-ah 36,836, Q3-ah 30,916 leh Q4-ah 40,432 te hralhchhuah a ni a. A lirthei an duanna zawk Baleno chu NEXA lirtheia hralh kal ber a ni a, Fronx hian a rawn dawt a ni. April thlaah phei kha chuan Fronx hralh zat hian Baleno pawh a rawn khum hial a. An tlangzarh atanga thla 10 chhungin nuai 1 hralh hman a ni a, a hnu thla 4 chhungin 50,000 chuang an hralh leh a ni.
Kum 2025-ah hian Maruti Suzuki chuan hmel thar nen Fronx hi tihchhuah an tum a. He an update tharah hian Maruti Suzuki in an duan liau liau, hybrid technology thar, a code hmingah pawh HEV an vuah hmangin an thawm beisei a ni a. A khawl lamah hian tuna Swift chhuak thar berin a hman ang, 1.2 litre, 3 cylinder khawl thar hlak hi a rawn hman ve beisei a ni bawk. He hybrid technology thar hi Baleno te, Brezza leh adangah pawh an hman tir beisei a ni.